जगभरातील पिझ्झाप्रेमींसाठी ओळखला जाणारा पिझ्झा हट हा ब्रँड आता नव्या मालकीकडे जाणार आहे. KFC, Taco Bell आणि Pizza Hut या लोकप्रिय फूड ब्रँड्सची मालकी असलेल्या यम ब्रँड्सने पिझ्झा हट व्यवसाय २.७ अब्ज डॉलरमध्ये विकण्याचा ऐतिहासिक निर्णय घेतला आहे. गेल्या काही वर्षांपासून विक्रीतील घसरण, वाढती स्पर्धा आणि ग्राहकांच्या बदलत्या पसंतीमुळे कंपनीवर दबाव वाढत होता. त्यामुळे यम ब्रँड्सने आपल्या व्यवसायाची पुनर्रचना करण्याच्या उद्देशाने हा मोठा व्यवहार केला आहे.
या करारानुसार चीनबाहेरील पिझ्झा हट व्यवसाय खासगी गुंतवणूक कंपनी लॉंगरेंज कॅपिटलकडे जाणार असून त्यासाठी सुमारे १.५ अब्ज डॉलर मोजले जाणार आहेत. दुसरीकडे, चीनमधील पिझ्झा हटच्या ४,३७५ हून अधिक रेस्टॉरंट्सची मालकी यम चायना होल्डिंग्सकडे हस्तांतरित होणार आहे. या व्यवहारासाठी यम चायना सुमारे १.२ अब्ज डॉलर खर्च करणार आहे. अशा प्रकारे एकूण व्यवहाराची किंमत तब्बल २.७ अब्ज डॉलर इतकी ठरली आहे.
हे ही वाचा:
तामिळनाडूत स्थानिक शेतकऱ्यांचा अॅपलविरोधात संताप
लोकसभा अध्यक्षांकडे अरविंद सावंत यांची धाव
तृणमूलचे माजी आमदार सब्यसाची दत्ता यांची पाच बँक खाती गोठवली
सोन्या-चांदीच्या दरात मोठी घसरण
१९५८ मध्ये अमेरिकेतील कॅन्सास येथे सुरू झालेला पिझ्झा हट आज जगातील सर्वात मोठ्या पिझ्झा साखळ्यांपैकी एक मानला जातो. जगभरातील हजारो शहरांमध्ये त्याची उपस्थिती असून जवळपास २० हजार रेस्टॉरंट्सचे विस्तृत जाळे कंपनीने उभारले आहे. मात्र अलीकडच्या काळात डॉमिनोजसारख्या प्रतिस्पर्धी कंपन्यांनी आक्रमक विस्तार आणि जलद डिलिव्हरीच्या जोरावर बाजारातील हिस्सा वाढवला. त्याचवेळी महागाई, वाढलेले ऑपरेशनल खर्च आणि ग्राहकांच्या बदलत्या खाद्य सवयींचा फटका पिझ्झा हटला बसला. परिणामी अनेक महत्त्वाच्या बाजारपेठांमध्ये विक्री अपेक्षेपेक्षा कमी राहिली.
यम ब्रँड्सने नोव्हेंबर २०२५ मध्ये पिझ्झा हटच्या भवितव्याबाबत धोरणात्मक आढावा सुरू केला होता. त्यानंतर विविध पर्यायांचा विचार करून अखेर व्यवसाय विक्रीचा निर्णय घेण्यात आला. कंपनीच्या मते, या व्यवहारामुळे KFC आणि Taco Bell सारख्या वेगाने वाढणाऱ्या ब्रँड्सवर अधिक लक्ष केंद्रित करता येईल. तसेच कृत्रिम बुद्धिमत्ता, डिजिटल तंत्रज्ञान आणि नव्या विस्तार योजनांमध्ये मोठी गुंतवणूक करण्यासाठी आवश्यक आर्थिक लवचिकता मिळणार आहे.
विशेष म्हणजे चीनमधील पिझ्झा हट व्यवसायाने अलीकडच्या काळात तुलनेने चांगली कामगिरी केली आहे. स्थानिक ग्राहकांच्या आवडीनुसार मेनूमध्ये करण्यात आलेले बदल, नवीन स्टोअर मॉडेल्स आणि आक्रमक विस्तारामुळे हा विभाग नफ्यात राहिला आहे. त्यामुळे यम चायनाने हा व्यवसाय पूर्णपणे ताब्यात घेण्याचा निर्णय घेतला आहे. कंपनीने २०२८ पर्यंत चीनमधील पिझ्झा हट आउटलेट्सची संख्या ६ हजारांहून अधिक करण्याचे लक्ष्य ठेवले आहे.
या अब्जावधी डॉलरच्या व्यवहारामुळे जागतिक फास्ट-फूड उद्योगात मोठी चर्चा रंगली असून नव्या मालकीखाली पिझ्झा हट पुन्हा एकदा बाजारात दमदार पुनरागमन करणार का, याकडे आता संपूर्ण जगाचे लक्ष लागले आहे.
