प्रक्षोभक पोस्ट, खोट्या बातम्यांप्रकरणी १०० सोशल मीडिया खाती बंद

सोशल मीडियावर प्रक्षोभक पोस्ट, खोट्या बातम्या आणि दिशाभूल करणारे दावे प्रसारित केल्याप्रकरणी दिल्ली पोलिसांनी १०० सोशल मीडिया खाती बंद केली आहेत. या प्रकरणी चारहून अधिक एफआयआर दाखल करण्यात आले असून, दिल्ली पोलिसांच्या इंटेलिजन्स फ्युजन अँड स्ट्रॅटेजिक ऑपरेशन्स (IFSO) विभागाकडून तपास सुरू आहे. पाकिस्तानमधून सक्रिय असलेल्या काही सोशल मीडिया हँडल्सचीही चौकशी केली जात असल्याची माहिती समोर आली आहे.

१० ऑक्टोबर रोजी दिल्लीमध्ये मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आंदोलन करण्यात आले होते. विशेष सखोल मतदार यादी पुनरीक्षणाच्या (एसआयआर) प्रक्रियेवर आक्षेप घेत कॉकरोच जनता पार्टी (सीजेपी) या गटाने आंदोलनाची हाक दिली होती. या आंदोलनानंतर सोशल मीडियावर विविध दावे आणि पोस्ट प्रसारित करण्यात आल्या.

राहुल गांधी यांच्या नेतृत्वाखालील रॅलीदरम्यान पोलिसांनी गोळीबार केला आणि त्यात पाच कार्यकर्त्यांचा मृत्यू झाला, असा दावा सोशल मीडियावर करण्यात आला होता. दिल्ली पोलिसांनी हा दावा फेटाळून लावत तो अफवा असल्याचे स्पष्ट केले. अशा पोस्टमुळे नागरिकांमध्ये संभ्रम निर्माण होण्याची शक्यता असल्याने पोलिसांनी नागरिकांना अप्रमाणित माहितीवर विश्वास न ठेवण्याचे आणि ती पुढे प्रसारित न करण्याचे आवाहन केले.

सोशल मीडियावर अफवा पसरवणाऱ्या आणि सार्वजनिक शांतता बिघडवण्याची शक्यता असलेल्या पोस्ट हटवण्याची कारवाईही करण्यात आली. पोलिसांच्या माहितीनुसार, सुमारे ५०० पोस्ट हटवण्यात आल्या आहेत. यापूर्वी १२ ऑक्टोबर रोजी सुमारे ३०० पोस्ट हटवल्याची माहिती समोर आली होती.

हे ही वाचा:

राणीनं डाव जिंकला…सोमेश्वर साखर कारखाना निवडणुकीत अजितदादा पॅनल २१-०

दिवाळीनंतर युपीआय व्यवहारांवर शुल्क

जंतर मंतरमध्ये घुसलेल्या ‘कॉक्रोच’ना घेतले ताब्यात

प्रिय सूर्यकांत, राजीनामा द्या….काँग्रेसने पोस्ट केली डीलिट

पाकिस्तानमधील हँडल्सचीही चौकशी

दिल्ली पोलिसांकडून पाकिस्तानमधून चालवली जात असल्याचा संशय असलेल्या काही सोशल मीडिया हँडल्सचीही तपासणी केली जात आहे. या हँडल्सवरून भारतविरोधी कथन प्रसारित केले जात असल्याचा आरोप आहे. या प्रकरणातील संबंधित खात्यांची भूमिका आणि सोशल मीडियावर प्रसारित झालेल्या दाव्यांची सत्यता तपासातून स्पष्ट होणार आहे. दरम्यान, खोट्या बातम्या, बनावट व्हिडिओ आणि अप्रमाणित दाव्यांमुळे नागरिकांमध्ये भीती व संभ्रम निर्माण होऊ शकतो. त्यामुळे सोशल मीडियावरील माहितीची सत्यता तपासल्यानंतरच ती पुढे प्रसारित करावी, असे आवाहन पोलिसांकडून करण्यात येत आहे.