शिवलिंगासह मूर्तींची विटंबना करणारा फिरोज पोलिसांच्या ताब्यात

- Advertisement -

राजस्थानमधील उदयपूर येथे मंदिराची तोडफोड आणि मूर्तींची विटंबना झाल्याच्या घटनेनंतर संतापाचे वातावरण निर्माण झाले आहे. सूरजपोल पोलीस ठाण्याच्या हद्दीतील इंद्रानगर बीडा परिसरात ही घटना घडल्याचे वृत्त आहे. मंदिरातील शिवलिंगासह अन्य मूर्तींची तोडफोड झाल्याचे समोर आल्यानंतर स्थानिकांनी पोलिसांना माहिती दिली. या प्रकरणी पोलिसांनी फिरोज ऊर्फ भुरिया नावाच्या व्यक्तीला ताब्यात घेतले असून, त्याची चौकशी सुरू आहे.

संबंधित घटना १७ सप्टेंबरच्या रात्री ही घटना घडल्याचे सांगण्यात येत आहे. मंदिरातील तोडफोडीचा व्हिडिओ समाजमाध्यमांवर प्रसारित झाल्यानंतर प्रकरण समोर आले. या दृश्यांमध्ये मंदिरातील काही मूर्ती आणि शिवलिंगाची तोडफोड झाल्याचे दिसत असल्याचे वृत्त आहे. घटनेची माहिती मिळताच पोलीस घटनास्थळी दाखल झाले. पोलिसांनी प्राथमिक तपास सुरू करत मंदिराच्या आसपासच्या परिसरातील सीसीटीव्ही चित्रण तपासले. त्यातून संशयिताची ओळख पटवून त्याला ताब्यात घेण्यात आल्याचे सांगण्यात आले आहे. सध्या त्याची चौकशी सुरू असून, तोडफोडीमागील नेमके कारण आणि घटनेशी संबंधित इतर बाबींचा तपास केला जात आहे.

घटनेनंतर शनिवारी स्थानिक नागरिकांनी मोठ्या संख्येने आंदोलन केले. आरोपीवर कठोर कारवाई करण्याची मागणी करण्यात आली. देहलीगेट परिसरातील व्यापारी आणि दुकानदारांनीही दुकाने बंद ठेवून या घटनेचा निषेध केला. आंदोलकांचे एक शिष्टमंडळ जिल्हाधिकारी गौरव अग्रवाल यांची भेट घेण्यासाठी गेले. दोषी व्यक्तीवर कठोर कारवाई करण्याबरोबरच त्याच्या कथित बेकायदा मालमत्तेवरही कारवाई करण्याची मागणी करण्यात आली.

स्थानिक भाजप नेते सनी पोखरणा यांनी घटनेचा निषेध करत मंदिरांच्या सुरक्षेसाठी सीसीटीव्ही कॅमेरे बसवण्याची मागणी केली. मंदिराची दुरुस्ती करण्यात यावी आणि सुरक्षेच्या दृष्टीने आवश्यक उपाययोजना कराव्यात, अशी मागणीही करण्यात आली आहे.

हे ही वाचा:

मागण्या पूर्ण होईपर्यंत होर्मुझची सामुद्रधुनी खुली करणार नाही!

विखे पाटील घराण्याची लेक स्वीडनच्या संसदेत

आशियाई क्रीडा स्पर्धेत भारतीय महिला क्रिकेट संघाची बांगलादेशवर मात

झारखंडचा ३० लाखांचे इनाम असलेला नक्षली ब्रजेश गंझूचे वाराणसीत एन्काऊंटर

पोलिसांनी सीसीटीव्ही चित्रणाच्या आधारे संशयिताला ताब्यात घेतले आहे. मात्र, घटनेमागील नेमके कारण काय होते, तोडफोडीचा उद्देश काय होता आणि या प्रकरणात आणखी कोणी सहभागी आहे का, याबाबतचा तपास अद्याप सुरू आहे. दरम्यान, घटनेनंतर परिसरात निर्माण झालेला तणाव लक्षात घेता प्रशासनाकडून परिस्थितीवर लक्ष ठेवले जात आहे. पोलिसांच्या तपासातून या प्रकरणातील पुढील माहिती समोर येण्याची शक्यता आहे.