झारखंडमध्ये नक्षलवादाविरोधात सुरू असलेल्या मोहिमेत सुरक्षा दलाला मोठे यश मिळाले आहे. इंटेलिजन्स ब्युरोच्या अचूक माहितीनुसार करण्यात आलेल्या कारवाईत पोलिसांनी शुक्रवारी चतरा आणि हजारीबाग जिल्ह्यांच्या सीमेवर चार कुख्यात नक्षलवाद्यांना ठार केले. ठार झालेल्यांमध्ये १५ लाखांचे बक्षीस असलेला कमांडर सहदेव महतो याचाही समावेश आहे.
पोलिसांना चतरा-हजारीबाग सीमेवर नक्षलवाद्यांच्या एका तुकडीची उपस्थिती असल्याची गुप्त माहिती मिळाली होती. त्यानुसार स्थानिक पोलिस आणि सुरक्षा दलांच्या संयुक्त पथकाने परिसराला घेराव घातला. पोलिसांची कारवाई होणार असल्याचे लक्षात येताच नक्षलवाद्यांनी गोळीबार सुरू केला, त्याला प्रत्युत्तर म्हणून पोलिसांनीही जोरदार कारवाई केली. अनेक तास चाललेल्या या चकमकीत चार नक्षलवादी जागीच ठार झाले, तर काही जण जखमी झाल्याची शक्यता व्यक्त केली जात आहे.
चकमकीनंतर राबविण्यात आलेल्या शोध मोहिमेत सुरक्षा दलाला मोठे यश मिळाले. घटनास्थळावरून दोन AK-47 रायफल्स, इतर देशी आणि आधुनिक शस्त्रे, नक्षलवादी साहित्य, दैनंदिन वापराच्या वस्तू आणि मोठ्या प्रमाणात दारुगोळा जप्त करण्यात आला आहे. ठार झालेला सहदेव महतो हा परिसरातील अनेक मोठ्या घटनांचा सूत्रधार मानला जात होता.
हे ही वाचा:
लाल किल्ला स्फोटप्रकरणातील ‘टेरर मॉड्युल’चा पर्दाफाश
‘रामायणा’वर वादग्रस्त विधान केल्याबद्दल प्रकाश राज यांच्यावर गुन्हा
इराण युरेनियमचा साठा सोपवण्यास सहमत
निदा खान आली समोर! गर्भवती असल्यामुळे जामीन द्या!
दरम्यान, झारखंडच्या पश्चिम भागातील सारंडा परिसरातील छोटानागरा पोलीस ठाण्याच्या हद्दीत, बालिबा जवळील चडराडेरा जंगलातही सुरक्षा दलांनी नक्षलवाद्यांच्या एका तुकडीला चारही बाजूंनी वेढा घातला असून, त्यांच्या पळून जाण्याचे सर्व मार्ग बंद केले आहेत. यासाठी हवाई देखरेखीचाही वापर केला जात आहे. माहितीनुसार, या तुकडीत १ कोटींचे बक्षीस असलेला नक्षलवादी मिसिर बेसरा देखील असल्याची शक्यता आहे आणि नक्षलवाद्यांची संख्या १०० हून अधिक असू शकते.
चाईबासा येथील पोलीस अधीक्षक अमित रेनू यांनी सांगितले की, जंगलातील शोध मोहीम अद्याप सुरू असून सविस्तर माहितीची प्रतीक्षा आहे. पश्चिमी सिंहभूम जिल्ह्यातील या भागात मागील तीन दिवसांत आयईडी स्फोट आणि गोळीबाराच्या घटनांमध्ये सुरक्षा दलांचे ६ जवान जखमी झाले आहेत.
