श्रावणात मटणासाठी हट्ट; वडिलांच्या मारहाणीत मुलाचा मृत्यू

पुण्यात श्रावण महिन्यात मटण बनवण्यावरून झालेला कौटुंबिक वाद इतका टोकाला गेला की, वडिलांनीच आपल्या मुलाची हत्या केल्याची धक्कादायक घटना समोर आली आहे. वारजे-माळवाडी परिसरात घडलेल्या या घटनेने परिसरात खळबळ उडाली आहे. पोलिसांनी या प्रकरणी मृत तरुणाच्या वडिलांना हत्येच्या आरोपाखाली अटक केली असून, आईलाही पुरावे नष्ट करण्यास मदत केल्याच्या आरोपावरून ताब्यात घेण्यात आले आहे.

पोलिसांच्या माहितीनुसार, महेश भगवान गायकवाड हा ३० वर्षीय तरुण २५ ऑगस्टच्या रात्री दारूच्या नशेत घरी आला होता. त्यावेळी त्याने घरात मटण बनवण्याचा आग्रह धरला. मात्र, श्रावण महिना सुरू असल्याने घरात मांसाहारी पदार्थ बनवण्यास त्याच्या आई-वडिलांचा विरोध होता. याच मुद्द्यावरून महेश आणि त्याच्या वडिलांमध्ये वाद सुरू झाला. सुरुवातीला शाब्दिक वाद असलेल्या या प्रकरणाचे काही वेळातच गंभीर हाणामारीत रूपांतर झाले.

आरोपानुसार, वडील भगवत सूर्यभान गायकवाड यांनी महेशला मारहाण करण्यास सुरुवात केली. चेहरा आणि डोक्यावर वारंवार मार लागल्याने महेश गंभीर जखमी झाला. त्याची प्रकृती बिघडल्यानंतर त्याचा मृत्यू झाला. एका साध्या कौटुंबिक वादातून हा प्रकार घडल्याने या घटनेने अनेक प्रश्न उपस्थित केले आहेत.
हे ही वाचा:
अभिमानास्पद! आशिया कपच्या रनमशीनमध्ये ३ भारतीयांचा दबदबा

पंतप्रधानपदासाठी मोदींनाच पहिली पसंती, राहुल गांधींनंतर विजयचे नाव

घटना घडल्यानंतर प्रकरण लपवण्याचाही प्रयत्न झाल्याचा आरोप आहे. पोलिसांच्या तपासात समोर आलेल्या माहितीनुसार, महेशच्या आईने घटनास्थळी पडलेले रक्ताचे डाग साफ केले. तसेच महेशच्या मोठ्या भावाची दिशाभूल करण्यासाठी घटनेबाबत चुकीची माहिती देण्यात आल्याचे पोलिसांचे म्हणणे आहे. मात्र, अखेर या प्रकरणाची माहिती पोलिसांपर्यंत पोहोचली आणि तपास सुरू झाल्यानंतर संपूर्ण घटना उघडकीस आली.

महेशच्या मोठ्या भावाने पोलिसांकडे तक्रार दाखल केल्यानंतर वारजे-माळवाडी पोलिसांनी या प्रकरणी गुन्हा दाखल केला. तपासादरम्यान पोलिसांनी ६४ वर्षीय भगवत सूर्यभान गायकवाड यांना हत्येच्या आरोपाखाली अटक केली. तर ६० वर्षीय पार्वती गायकवाड यांच्यावर पुरावे नष्ट करण्यास मदत केल्याचा आरोप ठेवण्यात आला आहे.

श्रावणात मांसाहार करण्यावरून सुरू झालेला वाद एका कुटुंबासाठी काळाचा घाव ठरला आहे. क्षुल्लक कारणावरून सुरू झालेला वाद हिंसक रूप धारण करून थेट जीवघेणा ठरल्याने ही घटना कौटुंबिक वाद किती गंभीर परिणाम घडवू शकतो, याची जाणीव करून देणारी आहे. या प्रकरणात नेमकी कोणत्या परिस्थितीत मारहाण झाली, महेशच्या मृत्यूचे वैद्यकीय कारण काय आहे आणि घटनेनंतर पुरावे नष्ट करण्याचा प्रयत्न कशाप्रकारे झाला, याचा पुढील तपास वारजे-माळवाडी पोलिसांकडून सुरू आहे.