ट्रम्प यांच्यावर १९९३ मध्ये बलात्काराचा आरोप

अमेरिकेचे राष्ट्राध्यक्ष डोनाल्ड ट्रम्प यांच्यावर १९९३ मध्ये बलात्कार केल्याचा गंभीर आरोप स्वित्झर्लंडच्या माजी सौंदर्यवती आणि मॉडेल बीट्रिस केउल यांनी केला आहे. जेफ्री एपस्टीन प्रकरणाशी संबंधित कागदपत्रांमध्ये या आरोपांचा उल्लेख झाल्याने अमेरिकेच्या राजकीय वर्तुळात पुन्हा खळबळ उडाली आहे. केउल यांच्या दाव्यानुसार, नोव्हेंबर १९९३ मध्ये न्यूयॉर्कमधील प्रसिद्ध प्लाझा हॉटेलमध्ये ही कथित घटना घडली. त्यावेळी त्या २४ वर्षांच्या होत्या आणि मॉडेल म्हणून काम करत होत्या. ट्रम्प आणि एपस्टीन यांच्याशी झालेल्या ओळखीतून पुढे हा प्रकार घडल्याचा दावा त्यांनी केला आहे.

केउल यांच्या म्हणण्यानुसार, सौंदर्यस्पर्धेशी संबंधित एका कार्यक्रमादरम्यान त्यांची ट्रम्प आणि एपस्टीन यांच्याशी भेट झाली होती. त्यावेळी त्यांना अमेरिकेचा व्हिसा मिळवून देण्यासह न्यूयॉर्क विद्यापीठात प्रवेश मिळवून देण्याचे आश्वासन देण्यात आल्याचा त्यांचा दावा आहे. त्यानंतर ट्रम्प यांच्या प्रतिनिधीने त्यांना हॉटेलमधील एका सुइटमध्ये बोलावले. तिथे ट्रम्प यांनी आपल्यावर जबरदस्तीने बलात्कार केल्याचा आरोप केउल यांनी केला आहे. या कथित घटनेनंतर आपल्याला दुखापत झाली आणि रक्तस्राव झाला, असेही त्यांनी सांगितल्याचे वृत्तात नमूद आहे. पुढे त्यांनी स्वित्झर्लंडला परतण्याचा निर्णय घेतला आणि ट्रम्प यांच्याशी संबंधित आणखी एका सौंदर्यस्पर्धेत सहभागी होण्याचे निमंत्रण नाकारले.
हे ही वाचा:
धमक्यांनंतर हुथींना खंडणी देण्याची सौदीची तयारी

चंद्रशेखरन यांच्या पुनर्नियुक्तीवर नोएल टाटा यांचे आक्षेप

साडेचार वर्षांत १३ हजारांहून अधिक शेतकरी आत्महत्या
अमेरिकेच्या प्रतिनिधीगृहातील न्यायिक समितीच्या डेमोक्रॅटिक सदस्यांनी प्रसिद्ध केलेल्या ५३ पानी अहवालात ११ महिलांच्या आरोपांचा उल्लेख असल्याचे वृत्त आहे. त्यापैकी पाच महिलांनी ट्रम्प यांच्यावर एपस्टीनच्या उपस्थितीत किंवा त्याच्याशी संबंधित परिस्थितीत लैंगिक अत्याचार अथवा बलात्कार केल्याचे आरोप केल्याचे अहवालात नमूद करण्यात आले आहे. या प्रकरणातील कागदपत्रांची हाताळणी आणि संबंधित व्यक्तींच्या भूमिकेची चौकशी करण्याची मागणीही करण्यात आली आहे.

दरम्यान, व्हाइट हाऊसने हे आरोप फेटाळून लावले असून, ते राजकीय हेतूने प्रेरित असल्याचा दावा केला आहे. या विशिष्ट आरोपांबाबत ट्रम्प यांच्याविरोधात न्यायालयीन निष्कर्ष आलेला नाही. त्यामुळे आरोप, त्यांचे पुरावे आणि एपस्टीन प्रकरणाशी संबंधित कागदपत्रांची स्वतंत्र पडताळणी यांना या प्रकरणात महत्त्व प्राप्त झाले आहे.