शाळेची इमारत वाहून गेली; पण मुख्याध्यापकांनी वाचवले १६०० विद्यार्थ्यांचे प्राण

नेपाळमध्ये आलेल्या भीषण फ्लॅश फ्लडच्या संकटात एका मुख्याध्यापकाच्या प्रसंगावधानामुळे तब्बल १ हजार ६४३ विद्यार्थ्यांचे प्राण वाचले. नुवाकोट जिल्ह्यातील त्रिभुवन त्रिशूली माध्यमिक विद्यालयाचे मुख्याध्यापक राजेंद्र दावाडी यांनी पुराचा धोका लक्षात येताच तातडीने शाळा रिकामी करण्याचा निर्णय घेतला. पाण्याचा प्रवाह वेगाने वाढत असल्याची माहिती मिळताच त्यांनी शाळेची घंटा वाजवून विद्यार्थ्यांना सुरक्षित ठिकाणी हलवण्यास सुरुवात केली. शिक्षक, कर्मचारी आणि बसचालकांच्या मदतीने विद्यार्थ्यांना शाळेच्या इमारतीबाहेर काढण्यात आले. काही विद्यार्थ्यांना वाहनांमधून तर काहींना पायी उंच आणि सुरक्षित भागात नेण्यात आले. शाळेच्या वसतिगृहात असलेल्या विद्यार्थिनींनाही तातडीने बाहेर काढण्यात आले.
हे ही वाचा:
नशामुक्त युवा, ड्रग्जमुक्त भारत हाच आपला संकल्प!

नेपाळ महापुराने घेतले ७३४ बळी, ३०० भारतीय बेपत्ता

पंजाबमध्ये ‘आप’ नेत्याची गोळ्या झाडून हत्या; फिरोजपूरमध्ये खळबळ

विद्यार्थ्यांना सुरक्षित ठिकाणी हलवल्यानंतर काही वेळातच पुराच्या पाण्याचा वेग इतका वाढला की शाळेची संपूर्ण इमारत पाण्याच्या प्रवाहात वाहून गेली. मात्र, त्याआधीच विद्यार्थ्यांना बाहेर काढल्याने मोठी जीवितहानी टळली. पुरामुळे परिसरातील संपर्क व्यवस्था खंडित झाली आणि अनेक विद्यार्थी व शिक्षकांना डोंगराळ भागात आश्रय घ्यावा लागला. काही विद्यार्थी अद्याप संपर्काबाहेर असल्याची माहिती मिळाल्यानंतर दावाडी यांनी त्यांच्या सुटकेसाठी प्रशासन आणि लष्कराची मदत मागितली.

एका बाजूला पुराच्या रौद्ररूपाने शाळा उद्ध्वस्त झाली, तर दुसऱ्या बाजूला मुख्याध्यापक राजेंद्र दावाडी यांच्या धाडसी निर्णयामुळे शेकडो कुटुंबांचे चिमुकले सुरक्षित राहिले. संकटाच्या काही निर्णायक क्षणांत घेतलेल्या त्यांच्या या निर्णयामुळे १ हजार ६४३ विद्यार्थ्यांचे जीव वाचले असून, दावाडी यांच्या कर्तव्यनिष्ठेचे आणि प्रसंगावधानाचे सर्वत्र कौतुक होत आहे.