छत्तीसगडमध्ये नक्षलवादाला मोठा धक्का

छत्तीसगडमधील नक्षलविरोधी मोहिमेला मोठे यश मिळाले असून छत्तीसगड राज्यातील सुकमा आणि बीजापूर जिल्ह्यांत एकूण ५१ नक्षलवाद्यांनी सुरक्षा दलांसमोर आत्मसमर्पण केले आहे. या सर्वांवर मिळून सुमारे १ कोटी ६१ लाख रुपयांचे बक्षीस जाहीर करण्यात आले होते. या घटनेमुळे बस्तर विभागात शांततेच्या दिशेने महत्त्वाचे पाऊल टाकले गेले असल्याचे मानले जात आहे.

पोलिस अधिकाऱ्यांनी दिलेल्या माहितीनुसार, आत्मसमर्पण करणाऱ्यांमध्ये ३४ महिला नक्षलवाद्यांचा समावेश आहे. बीजापूर जिल्ह्यात ३० नक्षलवाद्यांनी शरणागती पत्करली असून त्यात २० महिला आहेत, तर सुकमा जिल्ह्यात २१ नक्षलवादी मुख्य प्रवाहात परतले असून त्यात १४ महिला आहेत. हे सर्व नक्षलवादी अनेक वर्षांपासून जंगलात सक्रिय होते आणि विविध हिंसक कारवायांमध्ये त्यांचा सहभाग होता.
हे ही वाचा:
सुरजकुंड मेळ्यात भीषण अपघात

अमेरिकन शेअर बाजारात इतिहास

बीजापूरमध्ये आत्मसमर्पण करणाऱ्यांमध्ये काही कुख्यात नक्षल नेत्यांचाही समावेश आहे. यामध्ये बोटी पोडियम उर्फ मल्ला, सुखराम मडकाम आणि रीना पुनें यांचा उल्लेख करण्यात आला आहे. या प्रत्येकावर ८ लाख रुपयांचे बक्षीस जाहीर होते. हे नक्षलवादी नक्षल संघटनेच्या विविध दलांमध्ये महत्त्वाच्या जबाबदाऱ्या सांभाळत होते.

पोलीस प्रशासनानुसार, हे आत्मसमर्पण ‘पूना मार्गेम’ (नवीन मार्ग) या पुनर्वसन योजनेअंतर्गत झाले आहे. या योजनेत आत्मसमर्पण करणाऱ्या नक्षलवाद्यांना आर्थिक मदत, निवास, शिक्षण, रोजगार प्रशिक्षण आणि समाजात सन्मानाने पुन्हा सामावून घेण्यासाठी आवश्यक सुविधा दिल्या जातात. राज्य सरकारच्या या धोरणामुळे अनेक नक्षलवादी हिंसेचा मार्ग सोडून शांततामय जीवनाकडे वळत आहेत.

बस्तर रेंजचे वरिष्ठ पोलीस अधिकारी सुंदरराज पी. यांनी सांगितले की, नक्षल संघटनांची अंतर्गत फूट, स्थानिक आदिवासींचा घटता पाठिंबा आणि सुरक्षा दलांची सातत्यपूर्ण कारवाई यामुळे नक्षलवादी हतबल झाले आहेत. सरकारच्या विकासकामांमुळे आणि संवादाच्या धोरणामुळेही हा बदल घडून येत आहे.

मोठ्या संख्येने झालेल्या या आत्मसमर्पणामुळे छत्तीसगडमध्ये नक्षलवाद संपवण्याच्या दिशेने आशादायक वातावरण निर्माण झाले असून, येत्या काळात आणखी नक्षलवादी मुख्य प्रवाहात परततील, अशी अपेक्षा व्यक्त केली जात आहे.