चीनमध्ये मालवाहू जहाजाला लागलेल्या आगीत २० जणांचा मृत्यू

चीनमधील किंगदाओ शहरातील बेहाई शिपयार्डमध्ये परदेशी ध्वज असलेल्या मालवाहू जहाजाला गुरुवारी सकाळी भीषण आग लागली. दुरुस्ती आणि देखभालीसाठी शिपयार्डमध्ये उभ्या असलेल्या जहाजाला अचानक आग लागल्यानंतर काही क्षणांतच आगीने जहाजाचा मोठा भाग आपल्या कवेत घेतला. परिसरात धुराचे प्रचंड लोट पसरल्याने एकच खळबळ उडाली. प्राथमिक माहितीनुसार, जहाजावर ४२ जण होते. या दुर्घटनेत किमान २० जणांचा मृत्यू झाल्याचे वृत्त असून काही जण बेपत्ता असल्याने मृतांचा आकडा वाढण्याची शक्यता आहे.

दुर्घटनेची माहिती मिळताच अग्निशमन दल आणि बचाव पथकांनी तातडीने घटनास्थळी धाव घेतली. जहाजावरील अडकलेल्या व्यक्तींना बाहेर काढण्यासाठी युद्धपातळीवर प्रयत्न सुरू करण्यात आले असून जखमींना रुग्णालयात दाखल करण्यात आले आहे. हे जहाज लायबेरियाच्या ध्वजाखाली कार्यरत असल्याची माहिती आहे. आगीचे नेमके कारण अद्याप स्पष्ट झालेले नसून त्याचा तपास सुरू आहे.
हे ही वाचा:
स्थानिक चलनात व्यापाराला प्राधान्य

मोना अग्रवालला रौप्य, अवनी लेखराला कांस्य

या दुर्घटनेची गंभीर दखल चीनच्या प्रशासनाने घेतली असून बचावकार्याला सर्वोच्च प्राधान्य देण्यात आले आहे. बेपत्ता व्यक्तींचा शोध घेण्याबरोबरच आगीचे नेमके कारण शोधण्याचे प्रयत्न सुरू आहेत. तसेच जहाज दुरुस्ती केंद्रांमधील सुरक्षा व्यवस्थेची तपासणी करण्यावरही भर दिला जात आहे. या भीषण दुर्घटनेमुळे चीनमधील शिपयार्डमधील कामगारांची सुरक्षा आणि अग्निशमन यंत्रणेच्या कार्यक्षमतेचा मुद्दा पुन्हा ऐरणीवर आला आहे.