युद्धाच्या सावटात मोदी-पेझेश्कियन भेट; द्विपक्षीय संबंधांचा आढावा

शांघाय कोऑपरेशन ऑर्गनायझेशनच्या (SCO) शिखर परिषदेदरम्यान पंतप्रधान नरेंद्र मोदी यांनी सोमवारी (३१ ऑगस्ट) किर्गिस्तानची राजधानी बिश्केक येथे इराणचे राष्ट्राध्यक्ष मसूद पेझेश्कियन यांची भेट घेतली. फेब्रुवारीमध्ये इराण युद्ध सुरू झाल्यानंतर दोन्ही नेत्यांची ही पहिली प्रत्यक्ष भेट आहे. या भेटीत पश्चिम आशियातील सध्याची परिस्थिती, प्रादेशिक सुरक्षा आणि भारत-इराण संबंध यावर चर्चा झाल्याचं समोर आलं आहे. इराणच्या अर्ध-अधिकृत तस्नीम वृत्तसंस्थेनुसार, दोन्ही देशांनी द्विपक्षीय संबंधांचा आढावा घेतला आणि परस्पर हिताच्या क्षेत्रांमध्ये सहकार्य आणखी मजबूत करण्यावर भर दिला.

पश्चिम आशियातील संघर्षाच्या पार्श्वभूमीवर होर्मुझ सामुद्रधुनीतील परिस्थिती या भेटीतील महत्त्वाच्या मुद्द्यांपैकी एक असल्याचं वृत्त आहे. या सागरी मार्गातून होणारी तेल आणि एलएनजी वाहतूक भारतासाठी अत्यंत महत्त्वाची आहे. त्यामुळे या मार्गातील वाहतूक आणि ऊर्जा पुरवठ्याबाबत भारताच्या चिंता वाढल्या आहेत. भारताने पश्चिम आशियातील तणावावर संवाद आणि राजनैतिक मार्गाने तोडगा काढण्याची भूमिका सातत्याने मांडली आहे. संघर्षामुळे ऊर्जा पुरवठा आणि व्यापारी जहाजांच्या वाहतुकीवर परिणाम होऊ नये, यावरही भारताचा भर आहे.

हे ही वाचा:

नेपाळच्या पुरात वाहून गेलेल्या बँकेच्या तिजोरीत सापडले ५० कोटींचे सोने

पाण्याखालील मोहिमांसाठी नौदल सज्ज; स्वदेशी ‘निपुण’ ताफ्यात दाखल

मोदी-पाशिनयान भेटीने भारत-अर्मेनिया संबंधांना नवी दिशा

काँग्रेस मंत्री बसवराज म्हणतात, हजला जाण्याची इच्छा, पण धर्मांतरित व्हावे लागेल!

संघर्षाच्या पार्श्वभूमीवर भारतीय नागरिक आणि व्यापारी जहाजांवरील भारतीय खलाशांची सुरक्षा हाही महत्त्वाचा मुद्दा मानला जात आहे. होर्मुझमधील तणावामुळे जहाजांच्या हालचाली आणि ऊर्जा पुरवठ्यावर निर्माण होणाऱ्या संभाव्य अडचणी भारतासाठी चिंतेचा विषय आहेत. भारताच्या दृष्टीने चाबहार बंदराचं धोरणात्मक महत्त्वही या पार्श्वभूमीवर वाढतं. त्यामुळे इराणसोबतचे संबंध आणि पश्चिम आशियातील स्थैर्य भारताच्या व्यापार आणि संपर्क धोरणासाठी महत्त्वाचे आहेत.