नेतन्याहू यांच्या इशाऱ्यानंतर झालेल्या गाझामधील हल्ल्यात नऊ जणांचा मृत्यू

हमासने अमेरिकेच्या मध्यस्थीने केलेल्या युद्धबंदी कराराचे उल्लंघन केल्याच्या आरोपानंतर इस्रायलच्या संरक्षण दलांनी गाझामध्ये हवाई हल्ले केले. इस्रायलच्या हल्ल्यात नऊ जण ठार झाल्याची माहिती समोर आली आहे. पंतप्रधान नेतन्याहू यांनी इस्रायली सैन्याला गाझा पट्टीवर तात्काळ जोरदार हल्ले करण्याचे निर्देश दिल्यानंतर या घडामोडी घडल्या आहेत. वृत्तानुसार, इस्रायलने गाझामध्ये हल्ले करण्याच्या त्यांच्या निर्णयाबद्दल अमेरिकेला माहिती दिली होती.

एका लष्करी अधिकाऱ्याने सांगितले की, हमासच्या दहशतवाद्यांनी पिवळ्या रेषेच्या पूर्वेकडील इस्रायली सैन्यावर हल्ला केला, जी गाझाच्या इस्रायल व्याप्त भागाला उर्वरित एन्क्लेव्हपासून वेगळे करते. रफाह परिसरात तैनात असलेल्या सैन्यावर रॉकेट-प्रोपेल्ड ग्रेनेड (RPG) आणि स्नायपर गोळीबार झाल्याचे वृत्त आहे. या हल्ल्यानंतर, इस्रायलचे संरक्षण मंत्री इस्रायल काट्झ यांनी इशारा दिला की, इस्रायलच्या संरक्षण दलाच्या कर्मचाऱ्यांना लक्ष्य केल्याबद्दल हमासला मोठी किंमत मोजावी लागेल आणि इस्रायल मोठ्या ताकदीने प्रत्युत्तर देईल,” काट्झ म्हणाले. त्यांच्या वक्तव्यानंतर काही वेळातच, गाझा सिव्हिल डिफेन्सने वृत्त दिले की, इस्रायलने गाझा शहरातील अल-सब्रा परिसरात केलेल्या हवाई हल्ल्यात तीन महिला आणि एका पुरुषाचा मृत्यू झाला. दक्षिणेकडील खान युनूस शहरात, दुसऱ्या हल्ल्यात दोन मुले आणि एका महिलेसह पाच जणांचा मृत्यू झाला.

हे ही वाचा : 

“भारत- पाकिस्तान संघर्षात सात नवीन, सुंदर लढाऊ विमाने पाडण्यात आली”

पाक संरक्षण मंत्री म्हणतात, “काबुल भारताचा कठपुतली झालाय!”

अतिवृष्टीग्रस्त शेतकर्‍यांना ११ हजार कोटींचे येत्या पंधरा दिवसांत वितरण!

हमासकडून पुन्हा युद्धबंदीचे उल्लंघन, नेत्यानाहुंचे तात्काळ आणि शक्तिशाली हल्ल्याचे आदेश!

दरम्यान, अल शिफा रुग्णालयाचे संचालक डॉ. मोहम्मद अबू सलमिया यांनी सांगितले की, उत्तर गाझा येथील वैद्यकीय सुविधेजवळ किमान तीन स्फोटांचे आवाज ऐकू आले. इस्रायलने आरोप केला की यामुळे सध्या सुरू असलेल्या युद्धबंदी कराराचे उल्लंघन झाले आहे. हमास गटाने इस्रायली सैन्यावरील हल्ल्याची जबाबदारी नाकारली परंतु युद्धबंदी कायम ठेवण्याच्या आपल्या वचनबद्धतेची पुष्टी केली.

ऑक्टोबर २०२३ मध्ये सुरू झाल्यापासून इस्रायल हमास संघर्षात किमान ६८,५२७ लोक मारले गेले आहेत आणि १,७०,३९५ जखमी झाले आहेत. अल जझीरा नुसार, ७ ऑक्टोबर २०२३ रोजी हमासच्या नेतृत्वाखालील हल्ल्यांमध्ये इस्रायलमध्ये एकूण १,१३९ लोक मारले गेले आणि २५० हून अधिक लोकांना कैद करण्यात आले.