‘स्टारलिंक’ ठरतेय युद्धातील निर्णायक कडी!

रशिया-युक्रेन युद्धात महत्त्वाची भूमिका बजावणाऱ्या स्टारलिंक उपग्रह इंटरनेट सेवेवरून स्पेसएक्सचे प्रमुख इलॉन मस्क आणि युक्रेन यांच्यात नवा वाद निर्माण झाला आहे. युक्रेनच्या लष्कराने आक्रमक ड्रोन हल्ल्यांसाठी स्टारलिंकचा वापर करून सेवेच्या अटींचे उल्लंघन केल्याचा आरोप मस्क यांनी केला आहे. दुसरीकडे, युक्रेनचे अध्यक्ष वोलोदिमिर झेलेन्स्की यांनी स्टारलिंक आणि लष्करी वापरासाठीची स्टारशील्ड या दोन्ही सेवांचा वेग पूर्ववत झाल्याचे जाहीर केले. या सेवांवरील निर्बंधांमुळे युक्रेनच्या लष्करी मोहिमा आणि आघाडीवरील दळणवळण प्रभावित झाले होते.

२४ ऑक्टोबर रोजी ‘एक्स’वरील पोस्टमध्ये मस्क यांनी युक्रेनच्या लष्कराने स्टारलिंकच्या वापराच्या अटींचे उल्लंघन करून जीवघेण्या ड्रोन हल्ल्यांसाठी या सेवेचा वापर केल्याचा दावा केला. नागरी वापरासाठी उपलब्ध असलेल्या व्यावसायिक इंटरनेट सेवेचा अशा हल्ल्यांसाठी वापर करण्यास परवानगी नसल्याचे त्यांनी स्पष्ट केले. हा वापर शक्य करणारी त्रुटी मागील आठवड्यात बंद केल्याचेही त्यांनी सांगितले.

मस्क यांनी स्टारलिंक पूर्णपणे बंद झाल्यास युक्रेनची युद्धभूमीवरील आघाडी तातडीने कोसळू शकते, असा इशाराही दिला. युक्रेनच्या सुरुवातीच्या युद्धकाळात रशियन हल्ल्यांमुळे इतर दळणवळण व्यवस्था विस्कळीत झाल्यानंतर स्टारलिंकने महत्त्वाची भूमिका बजावल्याचे त्यांनी नमूद केले.

युक्रेनचे अध्यक्ष झेलेन्स्की यांचे सल्लागार सेरही बेस्क्रेस्नोव्ह यांनी मस्क यांच्या दाव्यावर आक्षेप घेतला. युक्रेनमध्ये स्टारलिंक टर्मिनल्सच्या वेगावर मर्यादा असल्यामुळे व्यावसायिक स्टारलिंकचा वापर मध्यम आणि लांब पल्ल्याच्या आक्रमक ड्रोन हल्ल्यांसाठी करणे शक्य नसल्याचे त्यांनी म्हटले.

हे ही वाचा:

‘फ्री काश्मीर’च्या घोषणांनंतर जामिया मिलिया इस्लामियातील वर्ग ऑनलाइन

वरळीतील उंच इमारतीमुळे सुरक्षेचा प्रश्न; केंद्र सरकार न्यायालयात

‘जैश’शी संबंधित मजकूर प्रसारित केल्याबद्दल रॅपिडो रायडरला महिममध्ये अटक

हरियाणातील गँगस्टर हिमांशू भाऊ अमेरिकेत अटकेत

स्टारलिंक आणि स्टारशील्ड सेवा पूर्ववत

झेलेन्स्की यांनी २४ ऑक्टोबर रोजी दोन्ही सेवांचा वेग आवश्यक पातळीवर परतल्याचे सांगितले. यापूर्वी काही सेवांवर ताशी १६० किलोमीटरची मर्यादा घालण्यात आली होती. त्यामुळे रशियन ड्रोन रोखण्याच्या मोहिमांमध्ये अडथळे निर्माण झाले आणि काही लष्करी कारवाया रद्द कराव्या लागल्या. युक्रेनच्या संरक्षण मंत्रालयाने उपग्रह जोडणी ताशी ४०० किलोमीटरपेक्षा अधिक वेगावरही स्थिर असल्याचे सांगितले.