जगभरातील अमेरिकन व्हिसा अपॉइंटमेंट्सला स्थगिती

अमेरिकेचे राष्ट्राध्यक्ष डोनाल्ड ट्रम्प यांच्या प्रशासनाने जगभरातील अमेरिकन दूतावास आणि वाणिज्य दूतावासांमधील व्हिसा अपॉइंटमेंट्स तात्पुरत्या स्वरूपात थांबवल्या किंवा पुढे ढकलल्या आहेत. ट्रम्प प्रशासनाच्या वाढत्या इमिग्रेशन क्रॅकडाऊनच्या पार्श्वभूमीवर हा निर्णय घेण्यात आला आहे. अमेरिकेच्या परराष्ट्र विभागाने जगभरातील कॉन्स्युलर अधिकाऱ्यांसाठी नव्या प्रशिक्षण कार्यक्रमाची सुरुवात केली असून, त्यासाठी व्हिसा अपॉइंटमेंट्सच्या वेळापत्रकात बदल करण्यात येत आहेत.

अमेरिकेच्या परराष्ट्र विभागाच्या प्रवक्त्याने सांगितले की, सर्व अमेरिकी दूतावास आणि वाणिज्य दूतावासांमध्ये जागतिक स्तरावर प्रशिक्षण कार्यक्रम सुरू करण्यात आला आहे. या प्रशिक्षणाचा उद्देश व्हिसा अर्जदारांची अधिक काटेकोर तपासणी करणे आणि अर्जांचे मूल्यांकन सर्वसमावेशक व एकसमान पद्धतीने करण्यासाठी अधिकाऱ्यांना तयार करणे हा आहे. विशेषतः अमेरिकेतील सरकारी सार्वजनिक सुविधांवर किंवा लाभांवर अवलंबून राहण्याची शक्यता असलेल्या अर्जदारांची ओळख पटवण्यावर भर दिला जाणार आहे.

या निर्णयाचा फटका आधीच व्हिसा मुलाखतीची तारीख मिळालेल्या अर्जदारांनाही बसला आहे. काही अर्जदारांना दूतावासांकडून ई-मेलद्वारे त्यांची नियोजित मुलाखत रद्द किंवा पुढे ढकलण्यात आल्याची माहिती देण्यात आली आहे. नवीन तारीख आणि वेळ नंतर कळवली जाईल, असे त्यांना सांगण्यात आले आहे. मात्र, अपॉइंटमेंट्स पुन्हा कधी सुरू होतील, याबाबत अमेरिकेने अद्याप निश्चित कालमर्यादा जाहीर केलेली नाही.

हे ही वाचा:

ऑपरेशन सिंदूरपूर्वी मोदींचे सैन्याला लष्करी कारवाईसाठी पूर्ण स्वातंत्र्य!

ऑपरेशन सिंदूरदरम्यान किराणा हिल्सवर हल्ला? माजी सीडीएस काय म्हणाले?

इराणसोबतच्या तेल व्यापाराप्रकरणी चार भारतीय कंपन्यांसह तीन व्यक्तींवर निर्बंध

तळोज्यात ४,७१० लिटर भेसळयुक्त दूध नष्ट; १५ जणांवर गुन्हा

व्हिसा अपॉइंटमेंट्सवरील हा निर्णय ट्रम्प प्रशासनाच्या व्यापक इमिग्रेशन धोरणाचा भाग मानला जात आहे. दुसऱ्या कार्यकाळात प्रशासनाने व्हिसा आणि ग्रीन कार्ड रद्द करण्यासह इमिग्रेशन अर्जांची अधिक कठोर तपासणी सुरू केली आहे. राजकीय भूमिका किंवा काही आंदोलनांमधील सहभाग यांसारख्या कारणांवरूनही काही अर्जांवर कारवाई करण्यात आल्याचे वृत्त आहे. प्रशासनाचा दावा आहे की, या उपाययोजनांमुळे अमेरिकेची राष्ट्रीय सुरक्षा अधिक मजबूत होईल.