भारताने बांगलादेशी नागरिकांसाठी पर्यटन व्हिसा सेवा पुन्हा सुरू करण्याचा महत्त्वपूर्ण निर्णय घेतला आहे. जवळपास दोन वर्षांनंतर ही सेवा पूर्ववत होत असून २८ जून २०२६ पासून पर्यटन व्हिसासाठी अर्ज स्वीकारण्यास सुरुवात होणार आहे. बांगलादेशातील भारतीय राजनैतिक कार्यालयांवर झालेल्या हल्ल्यांनंतर भारताने पर्यटन व्हिसा सेवा मोठ्या प्रमाणात मर्यादित केली होती.
बांगलादेशातील भारताचे नवे उच्चायुक्त दिनेश त्रिवेदी यांनी गुरुवारी (२५ जून) ढाका येथील जमुना फ्युचर पार्कमधील भारतीय व्हिसा अर्ज केंद्राला भेट दिली. यावेळी त्यांनी पर्यटन व्हिसा सेवा पुन्हा सुरू करण्याची घोषणा केली. “मला आनंद होत आहे की, २८ जूनपासून बांगलादेशी नागरिकांसाठी पर्यटन व्हिसाचे नियमित अर्ज स्वीकारण्यास सुरुवात होत आहे,” असे त्रिवेदी यांनी सांगितले. त्यांनी स्पष्ट केले की, वैद्यकीय व्हिसा आणि इतर तातडीच्या मानवतावादी स्वरूपाच्या अर्जांवर यापूर्वीप्रमाणेच प्राधान्याने प्रक्रिया केली जाईल.
सुरुवातीच्या टप्प्यात ढाका, राजशाही, चिटगाव, सिल्हेट आणि खुलना येथील पाच भारतीय व्हिसा अर्ज केंद्रांमार्फत पर्यटन व्हिसाचे अर्ज स्वीकारले जाणार आहेत. भविष्यात ही सुविधा आणखी विस्तारण्याचा भारताचा मानस असल्याचेही त्यांनी नमूद केले. भारत आणि बांगलादेश यांच्यातील जनसंपर्क आणि सांस्कृतिक संबंध अधिक दृढ करण्यासाठी हा निर्णय महत्त्वाचा ठरेल, असा विश्वास त्रिवेदी यांनी व्यक्त केला.
हे ही वाचा:
बंगालमध्ये न्यायिक अधिकाऱ्यांना ओलीस ठेवल्याप्रकरणी स्थानिक नेत्याला अटक
“पत्रकारांविषयी अपमानास्पद वक्तव्य करण्याचा हेतू नव्हता”
खासदार संजय दिना पाटलांकडून पत्रकारांना शिवीगाळ
चीनच्या भूमीत भारताचा सुवर्ण पराक्रम! महिला रिले संघाचे यश
ऑगस्ट २०२४ मध्ये बांगलादेशात उसळलेल्या अस्थिरतेदरम्यान भारतीय संस्थांवर हल्ले झाले होते. ५ ऑगस्ट २०२४ रोजी ढाक्यातील धनमंडी परिसरातील इंदिरा गांधी कल्चरल सेंटर येथे तोडफोड करून आग लावण्यात आली होती. तसेच बांगलादेशातील विविध शहरांमधील पाच भारतीय व्हिसा अर्ज केंद्रांवरही हल्ले झाले होते. भारताच्या विकास प्रकल्पांवर कार्यरत कर्मचाऱ्यांनाही धमक्या मिळाल्याची माहिती समोर आली होती. या सुरक्षेच्या पार्श्वभूमीवर भारताने पर्यटन व्हिसा सेवा स्थगित केली होती. मात्र, वैद्यकीय आणि इतर तातडीच्या कारणांसाठी व्हिसा सेवा सुरू ठेवण्यात आली होती. त्या काळातही भारत दररोज १,५०० हून अधिक व्हिसा जारी करत होता.
