बांगलादेश अंधारात! १० तास लोडशेडिंग, ८ वाजताच दुकानं बंद

बांगलादेशातील ऊर्जा संकट दिवसेंदिवस गंभीर होत असून, देशातील अनेक भागांमध्ये ९ ते १० तासांपर्यंत वीजपुरवठा खंडित होत आहे. वाढत्या वीजटंचाईचा परिणाम सर्वसामान्य नागरिकांसह उद्योग आणि व्यापारी क्षेत्रावरही होत आहे. परिस्थिती नियंत्रणात आणण्यासाठी सरकारने शॉपिंग मॉल्स आणि दुकाने रात्री ८ वाजेपर्यंत बंद करण्याचे आदेश दिले आहेत. दरम्यान, अतिरिक्त डिझेलचा पुरवठा मिळावा यासाठी बांगलादेशाने भारताकडे मदतीची मागणी केली आहे.

बांगलादेशातील वीज संकटाचा सर्वाधिक परिणाम ग्रामीण भागाला सहन करावा लागत आहे. काही भागांमध्ये दीर्घकाळ वीज नसल्याने नागरिकांचे दैनंदिन जीवन विस्कळीत झाले आहे. वीजपुरवठ्यातील तुटवड्यामुळे उद्योग आणि व्यावसायिक आस्थापनांनाही जनरेटरवर अवलंबून राहावे लागत असून, त्यामुळे उत्पादन खर्च वाढत आहे.

१२ ऑगस्टच्या राष्ट्रीय ग्रीडच्या आकडेवारीनुसार, सकाळी ८ वाजता देशातील वीज मागणी १५,२४९ मेगावॅट, तर उपलब्ध पुरवठा १२,९३५ मेगावॅट होता. त्यामुळे तब्बल २,३१४ मेगावॅटची तूट निर्माण झाली. पहाटे १ वाजता ही तूट ३,१९४ मेगावॅटपर्यंत पोहोचली होती. काही ग्राहकांनी दिवसाला तब्बल १६ तासांपर्यंत वीजपुरवठा खंडित होत असल्याची तक्रार केली आहे.

या संकटामागे सर्वात मोठे कारण नैसर्गिक वायूचा तुटवडा असल्याचे समोर आले आहे. एलएनजी पुरवठ्यात घट झाल्यामुळे गॅसवर आधारित वीजनिर्मिती प्रकल्पांच्या उत्पादन क्षमतेवर परिणाम झाला आहे. ऊर्जा संकटाचा परिणाम केवळ वीजपुरवठ्यावर मर्यादित राहिलेला नाही. वीजटंचाईमुळे औद्योगिक उत्पादन, व्यापार, घरगुती कामकाज आणि सेवा क्षेत्रावरही परिणाम होत आहे. वीज उपलब्ध नसल्याने अनेक उद्योगांना महागड्या पर्यायी ऊर्जास्रोतांचा वापर करावा लागत आहे.

हे ही वाचा:

पंजाबमध्ये ‘हायटेक कॉपी’ प्रकरणानंतर ४५४ फार्मसी ऑफिसरच्या भरतीला ब्रेक

ऐतिहासिक क्षण! लोकसभेच्या कामकाजाची सुरुवात प्रथमच ‘वंदे मातरम्’ने

घरासाठी व्हेज-नॉनव्हेजची अट? ताडदेवमधील रिअल इस्टेट एजंटचा व्हिडीओ व्हायरल

झारखंडमधील विद्यार्थ्यांचे आंदोलन २०व्या दिवशीही सुरू; मुख्यमंत्र्यांच्या घराला घेराव?

वीज निर्मितीसाठी आवश्यक इंधनाचा तुटवडा भरून काढण्यासाठी बांगलादेशाने भारताकडे अतिरिक्त डिझेल पुरवठ्याची मागणी केली आहे. यापूर्वीही भारताने बांगलादेशाला अतिरिक्त डिझेलचा पुरवठा केला होता. त्यामुळे सध्याच्या ऊर्जा संकटात भारताची भूमिका महत्त्वाची ठरणार आहे. दरम्यान, दीर्घकालीन ऊर्जा गरजा पूर्ण करण्यासाठी बांगलादेश सरकारने अमेरिकेकडून एलएनजी आयातीचा १२ वर्षांचा करार मंजूर केला आहे. या करारानुसार २०२६ ते २०३८ या काळात अमेरिकेतील Gunvor USA LLC कडून ११७ एलएनजी कार्गो मिळणार आहेत. वाढती ऊर्जा मागणी आणि पुरवठ्यातील अनिश्चितता लक्षात घेऊन हा निर्णय घेण्यात आला आहे.