सुरत-उदयपूरदरम्यान धावणार वंदे भारत एक्स्प्रेस

गुजरात आणि राजस्थानमधील प्रवाशांसाठी महत्त्वाची बातमी आहे. पश्चिम रेल्वेने सुरत ते उदयपूरदरम्यान वंदे भारत एक्स्प्रेस सुरू करण्याचा निर्णय घेतला आहे. आधुनिक सुविधा, वेगवान प्रवास आणि सुरक्षिततेचा संगम असलेली ही वंदे भारत एक्स्प्रेस दोन्ही शहरांमधील रेल्वे कनेक्टिव्हिटी अधिक मजबूत करणार आहे. स्वदेशी तंत्रज्ञानावर आधारित या अत्याधुनिक ट्रेनमध्ये प्रवाशांना आरामदायी आसनव्यवस्था, आधुनिक प्रवासी सुविधा आणि सुरक्षिततेच्या अद्ययावत सुविधा उपलब्ध करून देण्यात आल्या आहेत. या सेवेमुळे सुरत, गुजरातमधील प्रमुख शहरे आणि राजस्थानातील उदयपूर यांच्यातील प्रवास अधिक सुलभ आणि जलद होणार आहे.

पश्चिम रेल्वेचे मुख्य जनसंपर्क अधिकारी विनीत अभिषेक यांनी दिलेल्या माहितीनुसार, ट्रेन क्रमांक २६९०३ सुरत-उदयपूर वंदे भारत एक्स्प्रेस ४ ऑक्टोबर २०२६पासून धावणार आहे. ही गाडी सोमवार, बुधवार, गुरुवार, शुक्रवार, शनिवार आणि रविवार या दिवशी सकाळी ६ वाजून १० मिनिटांनी सुरतहून सुटेल आणि त्याच दिवशी दुपारी १ वाजून ४० मिनिटांनी उदयपूरला पोहोचेल. परतीच्या प्रवासासाठी ट्रेन क्रमांक २६९०४ उदयपूर-सुरत वंदे भारत एक्स्प्रेस ३ ऑक्टोबर २०२६पासून सुरू होईल. ही गाडी सोमवार, बुधवार, गुरुवार, शुक्रवार, शनिवार आणि रविवार या दिवशी दुपारी ३ वाजून ३५ मिनिटांनी उदयपूरहून सुटून रात्री ११ वाजता सुरतला पोहोचेल.
हे ही वाचा:
बिहारमध्ये अधिकारी असलेल्या दांपत्याकडे कोट्यवधींचे दागिने, घड्याळे, १ कोटी रोख

ठाण्यात बाळू पूर्णेकर हत्येप्रकरणी सहकारी पप्या शिंदे अटकेत

या वंदे भारत एक्स्प्रेसला दोन्ही दिशांनी भरूच, वडोदरा, आनंद, मणिनगर, असरवा, हिम्मतनगर, शामळाजी रोड, डुंगरपूर आणि झावर या स्थानकांवर थांबा देण्यात आला आहे. त्यामुळे या मार्गावरील प्रवाशांनाही जलद आणि आधुनिक रेल्वे सेवेचा लाभ मिळणार आहे. या ट्रेनमध्ये एक्झिक्युटिव्ह चेअर कार आणि एसी चेअर कार असे डबे असतील. वेगवान प्रवासासोबतच आरामदायी आसनव्यवस्था आणि आधुनिक सुविधा ही या सेवेची प्रमुख वैशिष्ट्ये असतील.

ट्रेन क्रमांक २६९०३च्या आरक्षणाला १ ऑक्टोबर २०२६पासून सुरुवात होणार असून, प्रवासी सर्व प्रवासी आरक्षण प्रणाली केंद्रांवर तसेच आयआरसीटीसीच्या संकेतस्थळावरून तिकीट बुक करू शकतील. आरक्षित तिकिटावर प्रवास करणाऱ्या प्रवाशांनी मूळ ओळखपत्र सोबत ठेवणे आवश्यक आहे. या ट्रेनचे थांबे, थांब्यांची वेळ आणि डब्यांची रचना यासंदर्भातील सविस्तर माहिती रेल्वेच्या अधिकृत चौकशी प्रणालीवर उपलब्ध होणार आहे. सुरत-उदयपूर वंदे भारत एक्स्प्रेसमुळे गुजरात आणि राजस्थानमधील पर्यटन, व्यापार आणि प्रवासी वाहतुकीला आणखी चालना मिळण्याची अपेक्षा आहे.