वैमानिक अल-हमामीला मृत्युदंड देण्याची यूएईची मागणी

फ्लायदुबईच्या विमानाच्या कॉकपिटवर झालेल्या हल्ल्याप्रकरणी हमाम अल-हमामी याला मृत्युदंडासह शक्य तितकी कठोर शिक्षा देण्याची मागणी संयुक्त अरब अमिरातीने केली असल्याचे इस्रायली वृत्तसंस्थेने म्हटले आहे. या प्रकरणाच्या तपासात अनेक इस्रायली अधिकारी यूएईला मदत करत असल्याचेही वृत्तात नमूद करण्यात आले आहे.

३० सप्टेंबर रोजी दुबईहून तेल अवीवकडे जाणाऱ्या या विमानात १७० हून अधिक प्रवासी आणि कर्मचारी होते. अल-हमामीने भारतीय कॅप्टन स्मित माछर यांच्यावर कॉकपिटमधील क्रॅश ऍक्सने हल्ला केला आणि विमानाचा ताबा घेण्याचा प्रयत्न केला. त्यानंतर प्रवासी आणि विमानातील कर्मचाऱ्यांनी हस्तक्षेप केला, तर इतर वैमानिकांनी विमानाला स्थिर करण्यास मदत केली. या घटनेनंतर विमानाला सौदी अरेबियात आपत्कालीन लँडिंग करावे लागले.

यूएईने या घटनेचे वर्णन दहशतवादी हल्ला असे केले आहे. अल-हमामी हा २९ वर्षीय ओमानी नागरिक असून, त्याला सौदी अरेबियात ताब्यात घेण्यात आले आणि नंतर चौकशीसाठी यूएईमध्ये आणण्यात आले.

हे ही वाचा:

कांदिवलीत सजली पंचतारांकित देखणी भिंत

रशियात ‘प्लेग’ची भीती? लॅब संशोधकाच्या मृत्यूनंतर २०० जण क्वारंटाइन

भ्रष्टाचाराच्या आरोपांवर मुख्यमंत्री मान यांच्या सहाय्यकाची सीबीआय चौकशी

‘दृश्यम-३’पाहून रचला वडिलांच्या हत्येचा कट

सौदी अरेबियात चौकशीदरम्यान अल-हमामीने विमान पाडायचे होते, असे सांगितल्याचे वृत्त आहे. द वॉल स्ट्रीट जर्नलने सौदीच्या एका अधिकाऱ्याच्या हवाल्याने ही माहिती दिली आहे. संबंधित अधिकाऱ्याला अल-हमामीच्या चौकशीबाबत माहिती देण्यात आली होती. तपास अधिकाऱ्यांकडून अल-हमामी सीरियामध्ये वास्तव्यास असताना कट्टरतावादी विचारसरणीच्या प्रभावाखाली आला होता का, याचीही चौकशी केली जात आहे. सीरियातील गृहयुद्धाच्या काळात तो तेथे काही काळ राहिला होता.

त्याच्या हटवण्यात आलेल्या ‘एक्स’ खात्यावरील ३,००० हून अधिक पोस्टचे स्क्रीनशॉट इंटरनेट आर्काइव्हच्या माध्यमातून अद्याप उपलब्ध असल्याचे सांगण्यात आले आहे. यापैकी काही पोस्टमध्ये महिलांनी नोकरी करण्यास विरोध करणारी भूमिका आणि बुरखा किंवा पडदा करणाऱ्या धार्मिक महिलांबद्दल पसंती व्यक्त करण्यात आल्याचे वृत्त आहे.

तपास अधिकारी त्याच्या विमान वाहतूक क्षेत्रातील पूर्वीच्या कारकिर्दीचाही तपास करत आहेत. त्याच्या वर्तणुकीबाबत यापूर्वी चिंता व्यक्त करण्यात आली असतानाही त्याला पुन्हा विमानाच्या कॉकपिटमध्ये काम करण्याची परवानगी कशी मिळाली, याचाही तपास केला जात आहे.