आखाती प्रदेशातील व्यापारी जहाजांवर होत असलेल्या सलग हल्ल्यांच्या पार्श्वभूमीवर भारताने कठोर राजनैतिक भूमिका घेतली आहे. याच पार्श्वभूमीवर या आठवड्यात दुसऱ्यांदा अमेरिकेचे कार्यवाहक राजदूत जेसॉन मीक्स यांना समन्स बजावण्यात आले आहे. ओमानच्या किनाऱ्याजवळ भारतीय खलाशी असलेल्या आणखी एका जहाजावर झालेल्या हल्ल्यानंतर हा निर्णय घेण्यात आला.
परराष्ट्र मंत्रालयातील अमेरिकाविषयक अतिरिक्त सचिवांनी अमेरिकन राजनैतिक अधिकाऱ्यांची भेट घेतली. भारतीय खलाशांच्या सुरक्षेबाबत वाढत्या चिंतेच्या पार्श्वभूमीवर नवी दिल्लीने आखाती प्रदेशातील बिघडत्या सागरी सुरक्षा परिस्थितीवर आपली प्रतिक्रिया अधिक तीव्र केली आहे. या ताज्या राजनैतिक पावलाच्या काही तास आधीच Directorate General of Shipping (डीजीएस) ने हॉर्मुझ सामुद्रधुनी, ओमानचा आखात आणि आसपासच्या समुद्री क्षेत्रांमध्ये कार्यरत असलेल्या सुमारे १८ हजार भारतीय खलाशांसाठी नवीन सुरक्षा सूचना (अॅडव्हायझरी) जारी केली होती.
अलीकडील काळात भारतीय चालक दल असलेल्या जहाजांवर तीन स्वतंत्र हल्ले झाले आहेत. यामध्ये ओमानच्या किनाऱ्याजवळ झालेल्या एका प्राणघातक हल्ल्याचाही समावेश आहे, ज्यामध्ये तीन भारतीय खलाशांचा मृत्यू झाला होता. पहिली घटना ८ जून रोजी घडली. MT Marivex या टँकरवर झालेल्या संशयित हल्ल्यानंतर जहाजाला आग लागली होती. मात्र, जहाजावरील सर्व २४ भारतीय खलाशी सुरक्षितपणे वाचविण्यात आले. दुसरी घटना १० जून रोजी समोर आली. MT Setebello या टँकरवर ओमानच्या आखातात हल्ला झाला. या जहाजावर २४ भारतीय खलाशी होते. त्यापैकी २१ जणांची सुरक्षित सुटका करण्यात आली, तर सुरुवातीला बेपत्ता असलेल्या तीन भारतीय खलाशांच्या मृत्यूची नंतर पुष्टी झाली.
हे ही वाचा:
हॉर्मुझ सामुद्रधुनी जवळील १८ हजार भारतीय खलाशांना हाय अलर्ट
होर्मुझ सामुद्रधुनी खुली करण्यास इराणची तयारी
केईएम रुग्णालय करणार डॉ. सेजल पवारची चौकशी, केले होते आक्षेपार्ह वक्तव्य
NEET च्या उमेदवारांना मिळणार अतिरिक्त १५ मिनिटे
तिसरा हल्ला गुरुवारी झाला. ओमानच्या किनाऱ्याजवळ भारतीय चालक दल असलेल्या आणखी एका व्यापारी जहाजाला लक्ष्य करण्यात आले. विविध वृत्तांनुसार या जहाजाची ओळख MT Jalveer अशी करण्यात आली आहे. या जहाजावर २० भारतीय खलाशी कार्यरत होते. मात्र, अधिकाऱ्यांनी अद्याप या घटनेच्या नेमक्या स्वरूपाबाबत अधिकृत माहिती दिलेली नाही.
