पॅकेज्ड फूडवर आता समोरच दिसणार ‘जास्त साखर’, ‘जास्त मीठा’ची चेतावणी?

भारतातील पॅकेज्ड खाद्यपदार्थांबाबत लवकरच महत्त्वाचा बदल होण्याची शक्यता आहे. भारतीय अन्न सुरक्षा आणि मानक प्राधिकरण अर्थात एफएसएसएआयने ज्या खाद्यपदार्थांमध्ये साखर, मीठ किंवा सॅच्युरेटेड फॅटचे प्रमाण जास्त आहे, अशा उत्पादनांच्या पॅकेटच्या समोरच्या बाजूला ठळक चेतावणी देण्याचा प्रस्ताव मांडला आहे. या प्रस्तावानुसार, संबंधित उत्पादनावर ‘जास्त साखर’, ‘जास्त मीठ’ किंवा ‘जास्त सॅच्युरेटेड फॅट’ अशी स्पष्ट माहिती ग्राहकांना समोरच दिसू शकते. सध्या पोषणमूल्याची माहिती प्रामुख्याने पॅकेटच्या मागील बाजूला दिली जाते. त्यामुळे उत्पादनातील साखर, मीठ किंवा चरबीचे प्रमाण जाणून घेण्यासाठी ग्राहकांना लेबलवरील माहिती बारकाईने तपासावी लागते.

समोरच्या बाजूला लाल रंगातील ठळक चेतावणी दिल्यास उत्पादन खरेदी करण्यापूर्वीच ग्राहकांना त्यातील आरोग्यासाठी चिंताजनक घटकांची कल्पना येईल. बिस्किटे, चिप्स, इन्स्टंट नूडल्स, गोड पेये आणि इतर प्रक्रिया केलेल्या पदार्थांमध्ये साखर, मीठ आणि सॅच्युरेटेड फॅटचे प्रमाण अधिक असू शकते. त्यामुळे ग्राहकांनी अधिक जागरूकपणे खाद्यपदार्थांची निवड करावी, हा या प्रस्तावामागचा मुख्य उद्देश आहे. वाढते स्थूलपण आणि आहाराशी संबंधित आजारांच्या पार्श्वभूमीवर हा प्रस्ताव महत्त्वाचा मानला जात आहे.
हे ही वाचा:
गिलकडून पडिक्कल-सुथारचं कौतुक-+

पोलिसांचे चालले आहे काय? उबाठा चा ईदचा जुलूस हनुमान मंदिर झाकले…

महिला हॉकी विश्वचषक : नेदरलँड्स- अर्जेंटिनामध्ये रंगणार महामुकाबला

अभिमानास्पद! आशिया कपच्या रनमशीनमध्ये ३ भारतीयांचा दबदबा

मात्र, खाद्य उद्योगाकडून अशा चेतावणी लेबलला विरोध होण्याची शक्यता आहे. उत्पादनाचे मूल्यांकन केवळ साखर, मीठ किंवा चरबीच्या प्रमाणावर करू नये, असा उद्योगाचा युक्तिवाद असू शकतो. त्यामुळे या प्रस्तावावर सरकार, एफएसएसएआय आणि खाद्य उत्पादक यांच्यातील चर्चा निर्णायक ठरणार आहे. विशेष म्हणजे, हा सध्या प्रस्ताव असून अंतिम नियम लागू झालेला नाही. अंतिम निर्णयानंतर कोणत्या प्रमाणापेक्षा जास्त साखर, मीठ किंवा सॅच्युरेटेड फॅट असलेल्या पदार्थांवर अशी चेतावणी बंधनकारक असेल आणि त्याची अंमलबजावणी कधीपासून होईल, हे स्पष्ट होणार आहे.