उन्हाळ्यातील कडक ऊन आणि वाढत्या तापमानात फ्रिजमधील थंड पाणी तात्पुरता दिलासा देत असले तरी ते शरीरासाठी हानिकारक ठरू शकते. त्याऐवजी मातीच्या माठातील पाणी हा एक उत्तम पर्याय आहे, जो शरीराला हळूहळू थंड करतो आणि कोणताही त्रास न देता आराम देतो.
विज्ञानानुसार, खूप थंड पाणी पिल्याने शरीराच्या तापमानाला अचानक धक्का बसतो. त्यामुळे घशातील रक्तवाहिन्या आकुंचन पावू शकतात आणि पचनक्रियाही मंदावते. अनेकदा थंड पाणी पिल्यामुळे घसा खवखवणे, खोकला किंवा पचनाशी संबंधित समस्या उद्भवू शकतात. आयुर्वेदानुसार, अतिथंड पाणी पचनशक्ती कमी करते, ज्यामुळे अन्न नीट पचत नाही आणि गॅस, अॅसिडिटीसारख्या तक्रारी वाढू शकतात.
याउलट, मातीच्या माठातील पाणी नैसर्गिक पद्धतीने थंड होते. माठाच्या पृष्ठभागावरून पाणी हळूहळू बाहेरील हवेशी संपर्कात येऊन वाफेच्या स्वरूपात उडते (वाष्पीभवन होते), ज्यामुळे पाणी थंड होते. ही थंडावा देण्याची प्रक्रिया शरीरासाठी संतुलित आणि सुरक्षित असते. आयुर्वेदातही मातीच्या भांड्यांना विशेष महत्त्व आहे. मातीमध्ये असे गुणधर्म असतात, जे पाण्याचा pH स्तर संतुलित ठेवण्यास मदत करतात. माठातील पाणी पोट थंड ठेवते, त्यामुळे अॅसिडिटी आणि जळजळ यांसारख्या समस्या कमी होऊ शकतात.
याशिवाय, माठातील पाणी शरीराला हायड्रेट ठेवण्यासोबतच नैसर्गिकरीत्या डिटॉक्स करण्यासही मदत करते. शरीरातील अनावश्यक घटक बाहेर टाकण्यास ते सहाय्यक ठरते. शरीराचे तापमान संतुलित राहिल्यास रक्ताभिसरण सुधारते आणि त्वचेवरही सकारात्मक परिणाम दिसून येतो.
हे ही वाचा:
नमाज पठण, मांसाहारी जेवण, देवांची थट्टा… नाशिकमध्ये कॉर्पोरेट जिहाद!
पुडुचेरी निवडणुक: साडीतल्या ‘नीला’ रोबोटकडून मतदारांचे स्वागत
इस्रायलकडून हिजबुल्लाह प्रमुखाच्या सचिवाचा खात्मा
पश्चिम आशियातील संकटाच्या पार्श्वभूमीवर पेट्रोलियम मंत्री कतार दौऱ्यावर
माठ खरेदी करताना काही गोष्टींची काळजी घेणे आवश्यक आहे. तज्ज्ञांच्या मते, पूर्णपणे नैसर्गिक मातीपासून बनवलेला आणि कोणतेही रसायन किंवा रंग न वापरलेला माठ निवडावा. जर भांड्यातून विचित्र वास येत असेल किंवा रंग हाताला लागत असेल, तर तो वापरू नये. चांगल्या प्रतीचा माठ हलका मातीचा सुगंध देतो आणि त्याचा आतील भाग थोडा खरखरीत असतो. माठाची जाडीही महत्त्वाची असते. जाड माठ पाणी अधिक वेळ थंड ठेवतो आणि टिकाऊही असतो. तसेच, खरेदीपूर्वी त्यात पाणी भरून गळती तर नाही ना हे तपासावे. योग्य आकाराचा माठ निवडल्यास तो घरात सहज वापरता येतो.
