‘शर्टलेस काँग्रेसी’ असे म्हणत काँग्रेसने गांधीजींचा शेअर केला फोटो!

भारतीय राष्ट्रीय काँग्रेसने इंडिया एआय इम्पॅक्ट समिट २०२६ दरम्यान झालेल्या ‘शर्टलेस’ आंदोलनाच्या दुसऱ्या दिवशी सोशल मीडिया प्लॅटफॉर्म ‘एक्स’वर महात्मा गांधींचा फोटो शेअर करून आपल्या आंदोलनाचे समर्थन करण्याचा प्रयत्न केला.

संघटनेने ‘एक्स’वरील पोस्टमध्ये लिहिले, “आम्ही गांधींचे वारस आहोत. शर्टलेस असलो तरी चालेल. कालही लढत होतो, पुढेही लढत राहू.”

आणखी एका पोस्टमध्ये यूथ काँग्रेसने म्हटले, “जेव्हा सत्ता ऐकण्यास नकार देते, तेव्हा युवक उभे राहतात.” केंद्र सरकारवर निशाणा साधत त्यांनी पुढे लिहिले, “जेव्हा ते आंदोलन करतात, तेव्हा ते देशभक्ती असते. जेव्हा आम्ही आंदोलन करतो, तेव्हा ते ‘नॅशनल शेम’ ठरते का?”

हे ही वाचा:

काँग्रेसचा शर्टलेस निषेध नेपाळच्या जनरल झेड चळवळीपासून प्रेरित!

पंतप्रधान कार्यालयात ‘ओरिजिन बायो’ला आमंत्रण

ट्रम्प यांचा सर्व देशांवर १०% नवा टॅरिफ लागू

उन्हाळ्यात आरोग्य सांभाळा, तंदुरुस्त राहा

शुक्रवारी राष्ट्रीय राजधानी दिल्लीतील भारत मंडपम येथे आयोजित उच्चस्तरीय इंडिया एआय इम्पॅक्ट समिटदरम्यान यूथ काँग्रेसच्या कार्यकर्त्यांनी कार्यक्रमस्थळी प्रवेश करून आंदोलन केले. आंदोलनकर्त्यांनी कथित बेरोजगारी, महागाई आणि भारत-अमेरिका व्यापार कराराच्या मुद्द्यावर केंद्र सरकार आणि पंतप्रधान नरेंद्र मोदी यांच्या विरोधात घोषणाबाजी केली.

प्रत्यक्षदर्शींनुसार, काही आंदोलनकर्त्यांनी समिटस्थळी आपले शर्ट काढून इंडिया एआय समिटच्या डिस्प्ले बोर्डसमोर उभे राहत घोषणाबाजी करत छायाचित्रे काढली. सुरक्षारक्षकांनी तात्काळ हस्तक्षेप करून आंदोलनकर्त्यांना ताब्यात घेतले आणि आंतरराष्ट्रीय कार्यक्रमात अडथळा येऊ नये म्हणून त्यांना परिसरातून बाहेर नेले.

या समिटमध्ये वरिष्ठ सरकारी अधिकारी, उद्योग क्षेत्रातील प्रतिनिधी आणि विदेशी प्रतिनिधीमंडळ उपस्थित होते. त्यामुळे या घटनेने व्यापक राजकीय प्रतिक्रिया उमटल्या. सत्ताधारी आघाडीच्या नेत्यांनी याला जागतिक मंचावर देशाची प्रतिमा मलिन करण्याचा प्रयत्न असल्याचे म्हटले, तर विरोधी पक्षातील नेत्यांनी याला लोकशाहीतील असहमती व्यक्त करण्याचा वैध अधिकार असे संबोधले.

यूथ काँग्रेसच्या या सोशल मीडिया पोस्ट आणि आंदोलनामुळे देशात तंत्रज्ञान, राजकारण आणि अभिव्यक्ती स्वातंत्र्याबाबत सुरू असलेली चर्चा अधिक तीव्र झाली आहे.