नेहा बोराला महत्त्व दिलयामुळे विद्यार्थी काँग्रेसमध्ये अस्वस्थता?

१२ ऑक्टोबर रोजी विरोधकांनी सर्वोच्च न्यायालयाच्या दिशेने काढलेल्या मोर्चादरम्यान कथित अतिवामपंथी अराजकतावादी नेहा बोरा या राहुल गांधी आणि प्रियंका गांधी वाड्रा यांच्या सोबत चालताना दिसल्यानंतर काँग्रेसमध्ये अस्वस्थता वाढल्याचे समोर आले आहे. मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यासाठी हा मोर्चा काढण्यात आला होता. मात्र, काँग्रेसच्या वरिष्ठ नेतृत्वासोबत नेहा बोरा यांची झालेली उपस्थिती विशेषतः पक्षाच्या विद्यार्थी संघटना नॅशनल स्टुडंट्स युनियन ऑफ इंडिया अर्थात एनएसयूआयच्या कार्यकर्त्यांमध्ये चर्चेचा विषय ठरली आहे.

या घटनेमुळे काँग्रेसचा डाव्या विचारसरणीच्या विद्यार्थी नेत्यांशी वाढत असलेला संबंधही चर्चेत आला आहे. विविध सामाजिक घटकांना आपल्या राजकीय छत्राखाली आणण्याचा आणि आपला जनाधार वाढवण्याचा काँग्रेस प्रयत्न करत असताना डाव्या विचारसरणीच्या विद्यार्थी नेत्यांना मिळणाऱ्या वाढत्या महत्त्वामुळे पक्षांतर्गत काही कार्यकर्त्यांमध्ये प्रश्न उपस्थित होत आहेत.

हे ही वाचा:

गोल्ड ईटीएफमधील मोठ्या गुंतवणुकीला ब्रेक

तिरंगा यात्रेपूर्वी अभिजित दिपकेला नोटीस

“दहा वेळा सर्वोच्च न्यायालयाची माफी मागतो”

निखिल वागळेंनी सर्वोच्च न्यायालयापुढे नाक घासले

मोर्चादरम्यान नेहा बोरा यांना दिलेल्या महत्त्वामुळे एनएसयूआयच्या काही सदस्यांमध्ये नाराजी असल्याचे सांगितले जात आहे. काँग्रेसची स्वतःची मोठी विद्यार्थी संघटना असताना प्रतिस्पर्धी विद्यार्थी संघटनेच्या अध्यक्षांना एवढे महत्त्व का दिले जात आहे, असा सवाल त्यांनी उपस्थित केला आहे.

राहुल गांधी आणि प्रियंका गांधी वाड्रा यांच्यासोबत नेहा बोरा चालतानाचे फोटो आणि व्हिडिओ मोठ्या प्रमाणावर चर्चेत आले. विशेष म्हणजे काँग्रेसचे अनेक वरिष्ठ नेतेही पक्षाच्या सर्वोच्च नेतृत्वाच्या जवळ दिसण्यासाठी प्रयत्न करत होते. त्यामुळे काँग्रेसच्या एका महत्त्वाच्या आंदोलनादरम्यान आपलीच विद्यार्थी संघटना बाजूला पडल्याची भावना काही एनएसयूआय कार्यकर्त्यांमध्ये निर्माण झाल्याचे सांगितले जाते.

ही नाराजी केवळ मोर्चापुरती मर्यादित राहिलेली नाही. मंगळवारी इंडिया आघाडीच्या पत्रकार परिषदेतही नेहा बोरा यांनी काँग्रेसच्या वरिष्ठ नेत्यांसोबत व्यासपीठावर स्थान मिळवले. त्यामुळे डाव्या विद्यार्थी संघटनांच्या नेत्यांना काँग्रेसकडून वाढते महत्त्व का दिले जात आहे, असा प्रश्न पक्षातील काही कार्यकर्त्यांनी उपस्थित केला आहे.

दरम्यान, एआयएसएच्या संकेतस्थळावर एनएसयूआय तसेच भाजपची विद्यार्थी संघटना अखिल भारतीय विद्यार्थी परिषद अर्थात एबीव्हीपी यांना उजव्या विचारसरणीच्या आणि जनविरोधी संघटना म्हणून वर्णन करण्यात आले आहे. एआयएसएच्या जाहीरनाम्यात एनएसयूआय आणि एबीव्हीपीच्या कथित विद्यार्थीविरोधी आणि जनविरोधी भूमिकेविरोधात संघटनेने संघर्ष केल्याचा उल्लेख आहे.

यामुळे ज्या संघटनेने काँग्रेसच्या स्वतःच्या विद्यार्थी संघटनेवरच उघडपणे टीका केली आहे, त्या संघटनेच्या नेत्याला काँग्रेसच्या वरिष्ठ नेतृत्वाच्या इतक्या जवळचे स्थान देण्याचा निर्णय योग्य आहे का, असा प्रश्न काही काँग्रेस कार्यकर्त्यांकडून उपस्थित केला जात आहे. काँग्रेसमधील काही नेत्यांनीही पक्षाकडे आधीपासूनच एनएसयूआयसारखी मजबूत विद्यार्थी संघटना असताना डाव्या विद्यार्थी नेत्यांना एवढे महत्त्व देण्याची गरज काय, असा सवाल केला आहे.

काँग्रेसच्या एका नेत्याने सांगितले की, एआयएसएचा प्रभाव प्रामुख्याने जवाहरलाल नेहरू विद्यापीठ अर्थात जेएनयूमध्ये आहे. मात्र, डाव्या विचारसरणीच्या विद्यार्थी नेत्यांना काँग्रेसशी जोडल्यामुळे विद्यापीठांच्या परिसरात पक्षाची स्थिती मजबूत झाली आहे का, असा प्रश्न त्यांनी उपस्थित केला.

काँग्रेसशी संबंधित राहिलेल्या माजी डाव्या विद्यार्थी नेत्यांच्या पार्श्वभूमीचा उल्लेख करत या नेत्याने जेएनयूमध्ये आजही एनएसयूआयची उपस्थिती फारशी मजबूत नसल्याचे निदर्शनास आणून दिले.

काँग्रेस सध्या विविध सामाजिक आणि राजकीय गटांना आपल्या छत्राखाली आणण्याचा प्रयत्न करत आहे. त्यात पुराणमतवादी हिंदू विचारसरणी असलेल्या मतदारांचाही समावेश आहे. अशा परिस्थितीत डाव्या राजकारणाशी वाढती जवळीक, विशेषतः धार्मिक प्रथांवर डाव्या विचारसरणीकडून केली जाणारी टीका, काँग्रेसला या मतदारांपर्यंत पोहोचण्यात अडचणी निर्माण करू शकते, अशी चिंता काही नेत्यांना आहे.

या वाढत्या अस्वस्थतेच्या पार्श्वभूमीवर राहुल गांधी यांनी पक्षातील युवक आणि विद्यार्थी नेत्यांना स्पष्ट संदेश दिल्याचे समोर आले आहे. काँग्रेस मुख्यालयात इंडियन यूथ काँग्रेस, एनएसयूआय आणि सेवा दलाच्या सदस्यांसोबत झालेल्या बैठकीत राहुल गांधी यांनी, पक्षात केवळ स्वतःला श्रेय मिळावे यासाठी प्रवेश केलेल्या लोकांनी चुकीच्या संघटनेत प्रवेश केला आहे, असे सांगितल्याचे वृत्त आहे.