सुचिकाचा ऐतिहासिक पंच

एशियन गेम्स २०२६ मध्ये भारतीय खेळाडू सुचिका तारियालने ऐतिहासिक कामगिरी करत मिश्र मार्शल आर्ट्स (एमएमए) या क्रीडा प्रकारात भारताचे पहिले पदक जिंकले. महिलांच्या पारंपरिक ६० किलो वजनी गटात सुचिकाने कांस्यपदक पटकावले. एशियन गेम्समध्ये एमएमएमध्ये पदक जिंकणारी ती पहिली भारतीय खेळाडू ठरली आहे.

सुचिकाची सुवर्णपदकाची स्वप्ने उपांत्य फेरीत थोडक्यात अपुरी राहिली. सिंगापूरच्या हुई हून टीओविरुद्ध झालेल्या चुरशीच्या लढतीत सुचिकाला अतिरिक्त वेळेपर्यंत रंगलेल्या सामन्यात पराभव स्वीकारावा लागला. अत्यंत कमी फरकाने झालेल्या या पराभवामुळे तिचे अंतिम फेरीत पोहोचण्याचे स्वप्न भंगले. मात्र, एशियन गेम्समधील एमएमएच्या पदार्पणात तिने कांस्यपदक निश्चित करून इतिहास घडवला.

यापूर्वी रविवारी झालेल्या उपांत्यपूर्व फेरीच्या सामन्यात सुचिकाने मंगोलियाच्या अल्तांचिमेग बैगलमाचा २-० असा पराभव केला होता. या विजयासह एशियन गेम्समध्ये एमएमए प्रकारात पदक निश्चित करणारी ती पहिली भारतीय खेळाडू बनली होती.

अनेक क्रीडा प्रकारांत उल्लेखनीय कामगिरी

३६ वर्षीय सुचिका तारियाल यांचा हा कांस्यपदक त्यांच्या कारकिर्दीतील आणखी एक महत्त्वाचा टप्पा ठरला आहे. यापूर्वी त्या राष्ट्रीय स्तरावरील ज्युदो खेळाडू राहिल्या असून, २०२२च्या बर्मिंगहॅम राष्ट्रकुल क्रीडा स्पर्धेत त्यांनी भारताचे प्रतिनिधित्व केले होते. त्या स्पर्धेत त्या कांस्यपदकाच्या सामन्यापर्यंत पोहोचल्या होत्या.

२०२३च्या एशियन गेम्समध्ये त्यांनी कुराश प्रकारात सहभाग घेतला. त्यानंतर जिऊ-जित्सूमध्येही त्यांनी आपली ओळख निर्माण केली. २०२४ मध्ये जिऊ-जित्सू फायटिंगमध्ये जागतिक विजेतेपद पटकावत त्यांनी आंतरराष्ट्रीय स्तरावर उल्लेखनीय कामगिरी केली.

सुचिकाने २०१७ मध्ये एमएमएमध्ये पदार्पण केले होते. सुरुवातीला विजयासह व्यावसायिक कारकिर्दीला सुरुवात केल्यानंतर त्यांनी सुमारे सात वर्षे या खेळापासून दूर राहून ज्युदो आणि जिऊ-जित्सूवर लक्ष केंद्रित केले. नोव्हेंबर २०२४ मध्ये ब्रेव्ह कॉम्बॅट फेडरेशनसोबत अनेक सामन्यांचा करार केल्यानंतर त्यांनी एमएमएमध्ये पुनरागमन केले.

गुडघ्याच्या दुखापतीसारख्या आव्हानांवर मात करत सुचिकाने पुन्हा स्पर्धात्मक पातळीवर दमदार पुनरागमन केले. क्रीडा क्षेत्राबरोबरच लोकप्रिय टीव्ही रिअॅलिटी शो ‘रोडीज’मधील सहभागामुळेही त्यांना ओळख मिळाली आहे.

आयची-नागोया एशियन गेम्समध्ये मिश्र मार्शल आर्ट्सचा प्रथमच समावेश करण्यात आला आहे. याशिवाय फ्रीस्टाइल बीएमएक्स, टेकबॉल, पॅडल, सर्फिंग आणि व्हर्च्युअल तायक्वांदो या क्रीडा प्रकारांचाही प्रथमच समावेश झाला आहे.

सुचिका अंतिम फेरीत पोहोचू शकली नसली, तरी तिचे कांस्यपदक भारतीय एमएमएच्या इतिहासातील महत्त्वपूर्ण कामगिरी ठरले आहे.