राष्ट्रीय कुस्तीपटू सागर धनखड यांच्या हत्याप्रकरणातील आरोपी ऑलिंपिक पदक विजेता सुशील कुमार याच्या जामीन अर्जावर दिल्ली उच्च न्यायालयाने दिल्ली पोलिसांना नोटीस बजावली आहे. न्यायालयाने या प्रकरणात पोलिसांकडून स्थिती अहवाल (स्टेटस रिपोर्ट) सादर करण्याचे निर्देश दिले असून पुढील सुनावणी ४ मे रोजी होणार आहे.
६ फेब्रुवारी रोजी रोहिणी न्यायालयाने सुशील कुमार यांचा नियमित जामीन अर्ज फेटाळल्यानंतर त्यांनी त्या निर्णयाला उच्च न्यायालयात आव्हान दिले होते. मे २०२१ मध्ये घडलेल्या सागर धनखड हत्याकांड प्रकरणात सुशील कुमार आरोपी असून सध्या ते न्यायालयीन कोठडीत आहेत.
या प्रकरणी १३ ऑगस्ट २०२५ रोजी सर्वोच्च न्यायालयात सुनावणी झाली होती. सर्वोच्च न्यायालयाने सुशील कुमार यांना दिलेला जामीन रद्द करत एका आठवड्यात आत्मसमर्पण करण्याचे आदेश दिले होते. न्यायमूर्ती संजय करोल आणि प्रशांत कुमार मिश्रा यांच्या खंडपीठाने सागर धनखड यांच्या वडिलांनी दाखल केलेली विशेष परवानगी याचिका (एसएलपी) ग्राह्य धरत दिल्ली उच्च न्यायालयाच्या जामीन आदेशाला आव्हान दिले होते.
४ मे २०२१ रोजी छत्रसाल स्टेडियमच्या पार्किंग परिसरात कथित मालमत्ता वादातून हरियाणातील रोहतक येथील माजी ज्युनिअर राष्ट्रीय कुस्ती चॅम्पियन सागर धनखड आणि त्यांचे मित्र सोनू व अमित कुमार यांच्यावर हल्ला झाल्याचा आरोप आहे. या घटनेत सागर धनखड यांचा मृत्यू झाला होता.
घटनेनंतर सुशील कुमार १८ दिवस फरार होते. दिल्ली पोलिसांच्या माहितीनुसार, या काळात त्यांनी पंजाब, उत्तर प्रदेश, उत्तराखंड आणि हरियाणा येथे हालचाली केल्या. अखेर दिल्लीतील मुंडका परिसरातून त्यांना अटक करण्यात आली. अटकेपूर्वी ते काही रोख रक्कम घेण्यासाठी आले होते आणि त्यांनी एका राष्ट्रीय स्तरावरील खेळाडूकडून स्कूटी उधार घेतल्याचेही तपासात उघड झाले होते.
ऑक्टोबर २०२२ मध्ये दिल्लीतील खालच्या न्यायालयाने सुशील कुमार आणि अन्य १७ जणांविरुद्ध खुनासह दंगल व गुन्हेगारी कटाशी संबंधित भारतीय दंड संहितेच्या विविध कलमांखाली आरोप निश्चित केले होते. त्यानंतर या प्रकरणातील खटल्याची औपचारिक सुनावणी सुरू झाली आहे.
