– फिफा विश्वचषक २०२६ च्या अंतिम सामन्यापूर्वी स्पेनसाठी दिलासादायक बातमी समोर आली आहे. अर्जेंटिनाविरुद्धच्या अंतिम लढतीपूर्वी संघाचा युवा स्टार लामिन यामाल पूर्णपणे तंदुरुस्त झाला असून तो अंतिम सामन्यासाठी सज्ज असल्याची माहिती स्पेनचे मुख्य प्रशिक्षक लुईस डे ला फुएंते यांनी दिली.
फ्रान्सविरुद्धच्या उपांत्य फेरीतील विजयानंतर १९ वर्षीय यामाल लंगडत मैदानाबाहेर जाताना दिसला होता. दुखापतीमुळे त्याने गुरुवारी सरावालाही दांडी मारली होती. त्यामुळे तो अंतिम सामना खेळणार की नाही, याबाबत साशंकता निर्माण झाली होती.
मात्र, प्रशिक्षक डे ला फुएंते यांनी या सर्व चर्चांना पूर्णविराम देत सांगितले की, यामालला जोरदार मार लागला होता. खबरदारीचा उपाय म्हणून त्याला विश्रांती देण्यात आली होती. शुक्रवारी त्याने संघासोबत पूर्ण सराव केला असून तो आता शंभर टक्के फिट आहे.
स्पेन २०१० नंतर प्रथमच विश्वचषकाच्या अंतिम फेरीत पोहोचला आहे. दुसरीकडे, अर्जेंटिना सलग दुसरे आणि एकूण चौथे विश्वविजेतेपद पटकावण्याच्या निर्धाराने मैदानात उतरणार आहे.
प्रशिक्षकांच्या मते, अंतिम फेरीत जगातील दोन सर्वोत्तम संघ आमनेसामने असतील. विजय त्या संघाचा होईल जो आपल्या गुणवत्तेचा आणि संधींचा अधिक प्रभावी वापर करेल.
दरम्यान, अर्जेंटिनाचा कर्णधार लिओनेल मेस्सी याला रोखण्यासाठी स्वतंत्र ‘मॅन-टू-मॅन मार्किंग’ केली जाणार नसल्याचेही डे ला फुएंते यांनी स्पष्ट केले. मेस्सीने या स्पर्धेत अर्जेंटिनाच्या १९ गोलांपैकी १२ गोलमध्ये थेट योगदान दिले असले, तरी त्याच्यासाठी वेगळी रणनीती आखण्याऐवजी संघात्मक बचावावर भर दिला जाणार असल्याचे त्यांनी सांगितले.
यामालबाबत बोलताना प्रशिक्षकांनी त्याला मेस्सीची नक्कल न करता स्वतःची स्वतंत्र शैली कायम ठेवण्याचा सल्लाही दिला.
