जाडेजाची ७२ धावांची खेळी फोल, तिसऱ्या कसोटी इंग्लंडची भारतावर २२ धावांनी मात

रवींद्र जाडेजाची ७२ धावांची जिगरबाज खेळी अखेर अपयशी ठरली. भारताला अवघ्या २२ धावांनी इंग्लंडविरुद्धचा तिसरा कसोटी सामना गमवावा लागला. सोमवारी लॉर्ड्स कसोटीत शेवटच्या दिवशी इंग्लंडने भारतीय संघाला केवळ १७० धावांवर गारद केलं आणि सामना जिंकला. या विजयासह इंग्लंडने पाच सामन्यांच्या कसोटी मालिकेत २-१ अशी आघाडी घेतली. यापूर्वी बेन स्टोक्सच्या नेतृत्वाखालील संघाने लीड्स कसोटीत भारताला पाच विकेट्सनी हरवलं होतं. भारताने दुसरा कसोटी सामना (एजबॅस्टन कसोटी) ३३६ धावांनी जिंकला होता.

लॉर्ड्स कसोटीत इंग्लंडने नाणेफेक जिंकून प्रथम फलंदाजी करण्याचा निर्णय घेतला आणि पहिल्या डावात १० विकेट्स गमावून ३८७ धावा केल्या. त्यांच्यासाठी जो रूटने १०४, जेमी स्मिथने ५१ आणि ब्रायडन कार्सने ५६ धावांची खेळी केली. त्यानंतर भारताने देखील १० विकेट्स गमावून ३८७ धावा केल्या. भारताकडून केएल राहुलने १००, ऋषभ पंतने ७४ आणि रवींद्र जडेजाने ७२ धावांची खेळी केली. दुसऱ्या डावात इंग्लंडने १० विकेट्स गमावून १९२ धावा केल्या आणि भारतासमोर १९३ धावांचे लक्ष्य ठेवले, जे भारताला गाठता आले नाही आणि १७० धावांवर संघ ऑलआऊट झाला.

हे ही वाचा:

फसव्या मतदारांची नावे हटवल्याने तेजस्वी यादवांची अस्वस्थता वाढेल

नशा विरोधात ‘युवा आध्यात्मिक समिट’ सुरू होणार

…तर आधी गावे विकसित करावी लागतील

जैव इंधनाच्या माध्यमातून भारतात नवक्रांती घडणार

भारताचा दुसरा डाव

भारताचा दुसरा डाव धक्क्यांनिशी सुरू झाला. फक्त ५ धावांवर जोफ्रा आर्चरने यशस्वी जैस्वालला विकेटच्या मागे जेमी स्मिथकडून झेलबाद केलं. तो शून्यावर बाद झाला. त्यानंतर केएल राहुल आणि करुण नायरने डाव सावरण्याचा प्रयत्न केला. दोघांनी दुसऱ्या विकेटसाठी ६६ चेंडूत ३६ धावा जोडल्या. ब्रायडन कार्सने ही भागीदारी तोडली. त्याने नायरला एल्बीडब्ल्यू बाद केलं. नायरने ३३ चेंडूत १ चौकाराच्या मदतीने १४ धावा केल्या. चौथ्या क्रमांकावर आलेला कर्णधार शुभमन गिल पहिल्या डावानंतर दुसऱ्या डावातही मोठी खेळी करू शकला नाही. त्याला देखील कार्सने एल्बीडब्ल्यू बाद केलं. त्यानंतर बेन स्टोक्सने नाईट वॉचमन आकाश दीपला बोल्ड केलं. तो ११ चेंडूत केवळ १ धाव करू शकला.

दुसऱ्या दिवसाचा खेळ ५८/४ पासून सुरू झाला. पहिल्या सत्रात भारताने तीन विकेट्स गमावल्या. लंचपूर्वी ऋषभ पंत (९ धावा), केएल राहुल (३९ धावा) बाद झाले. त्यानंतर वॉशिंग्टन सुंदर शून्यावर बाद झाला. मग नितीश (१३) देखील माघारी परतला. दुसऱ्या सत्रात जडेजाला जसप्रीत बुमराहची साथ मिळाली. दोघांनी १३२ चेंडूत ३५ धावांची भागीदारी केली, जी बेन स्टोक्सने तोडली. त्याने बुमराहला सॅम्युअल कुककडून झेलबाद केलं. बुमराहने ५४ चेंडूत ५ धावा केल्या. त्यानंतर जडेजाला मोहम्मद सिराजची साथ मिळाली. दोघांनी शेवटच्या विकेटसाठी ८० चेंडूत २३ धावा केल्या. सिराजला शोएब बशीरने बोल्ड केलं. तो ४ धावा करून बाद झाला, तर जडेजा १८१ चेंडूत ६१ धावांवर नाबाद राहिला. जडेजाने १५० चेंडूत त्याच्या कसोटी कारकिर्दीतील २५वे अर्धशतक पूर्ण केलं. इंग्लंडकडून दुसऱ्या डावात जोफ्रा आर्चर आणि बेन स्टोक्सने प्रत्येकी तीन विकेट्स घेतल्या, ब्रायडन कार्सने दोन विकेट्स घेतल्या, तर क्रिस वोक्स आणि शोएब बशीरने प्रत्येकी एक विकेट घेतली.

इंग्लंडचा दुसरा डाव

वॉशिंग्टन सुंदरच्या घातक गोलंदाजीमुळे भारताने इंग्लंडला दुसऱ्या डावात १९२ धावांवर ऑलआऊट केलं. त्यामुळे भारताला विजयासाठी १९३ धावांचे लक्ष्य मिळालं. याआधी दोन्ही संघांचे पहिले डाव समान ३८७ धावांवर संपले होते.

चौथ्या दिवशी इंग्लंडचा खेळ २/० पासून सुरू झाला होता. झॅक क्रॉली आणि बेन डकेट क्रीजवर होते. पहिल्या सत्रात मोहम्मद सिराजने कहर करत डकेट आणि ओली पोपला माघारी पाठवलं. डकेटने १२ आणि पोपने ४ धावा केल्या. त्यानंतर नितीश कुमार रेड्डीने झॅक क्रॉलीला यशस्वी जैस्वालकडून झेलबाद केलं. तो ४९ चेंडूत २२ धावा करून परतला. याच सत्रात आकाश दीपने हॅरी ब्रूक (२३) ला बोल्ड केलं.

दुसऱ्या सत्रात भारतीय गोलंदाजांनी वर्चस्व दाखवलं. सुंदरने इंग्लंडला दोन मोठे झटके दिले. त्याने प्रथम जो रूटला बोल्ड केलं. रूटने ९६ चेंडूत १ चौकारासह ४० धावा केल्या. नंतर जेमी स्मिथला देखील बोल्ड केलं, तो ८ धावा करून बाद झाला.

तिसऱ्या सत्रातही सुंदरने आपली कामगिरी सुरू ठेवली आणि बेन स्टोक्स (३३) आणि शोएब बशीर (२) ला बोल्ड केलं. बुमराहने क्रिस वोक्स (१०) आणि ब्रायडन कार्स (१) ला बाद केलं. शेवटी जोफ्रा आर्चर ५ धावांवर नाबाद राहिला. भारताकडून दुसऱ्या डावात सुंदरने चार विकेट्स घेतल्या, बुमराह आणि सिराजने प्रत्येकी दोन विकेट्स घेतल्या, तर नितीश रेड्डी आणि आकाश दीपने प्रत्येकी एक विकेट घेतली.