भारतीय बॅडमिंटन स्टार पी. व्ही. सिंधू हिने रविवारी इतिहास रचत जपान ओपन २०२६ स्पर्धेच्या महिला एकेरीचे विजेतेपद पटकावले. जपान ओपन जिंकणारी ती पहिली भारतीय खेळाडू ठरली आहे.
३१ वर्षीय सिंधूने अंतिम सामन्यात विद्यमान विश्वविजेती जपानच्या अकाने यामागुची हिचा २१-१७, २१-१७ अशा सरळ गेममध्ये पराभव केला. अवघ्या ५० मिनिटांत सिंधूने हा सामना जिंकत आपल्या आक्रमक खेळाची पुन्हा एकदा झलक दाखवली.
सात वर्षांनंतर मोठ्या किताबावर नाव
बीडब्ल्यूएफ वर्ल्ड टूरवरील मोठे विजेतेपद सिंधूने तब्बल सात वर्षांनंतर जिंकले आहे. २०२२ मध्ये राष्ट्रकुल स्पर्धेचे सुवर्णपदक जिंकल्यानंतर डाव्या घोट्याच्या स्ट्रेस फ्रॅक्चरमुळे तिच्या कारकिर्दीला मोठा धक्का बसला होता. मात्र २०२६ हंगामात सिंधूने सातत्यपूर्ण कामगिरी करत मोठ्या स्पर्धांमध्ये उपांत्यपूर्व आणि उपांत्य फेरी गाठली. अखेर जपान ओपनमध्ये तिने बहुप्रतीक्षित विजेतेपदावर मोहोर उमटवली.
हे ही वाचा:
वांगचुक प्रकरण गेले न्यायालयात; पत्नीचा दावा
हरित ट्रॅकवर वेगात; हायड्रोजन ट्रेन झोकात
नगरसेवक रमेश म्हात्रे यांचा जामीन रद्द; पुन्हा तुरुंगात जाणार
दिंडीतील वारकऱ्यांसाठी कारुळकरांचा महाप्रसाद
सामन्यातील थरार
दुसऱ्या गेममध्ये २०-१७ अशी आघाडी असताना यामागुचीचा फटका बाहेर गेल्याचा निर्णय देण्यात आला. मात्र जपानी खेळाडूने तातडीने ‘चॅलेंज’ घेतले. काही क्षणांच्या व्हिडिओ पुनरावलोकनानंतर निर्णय सिंधूच्या बाजूने आला आणि तिने कोर्टाला वंदन करत आनंद साजरा केला. त्यानंतर ती आपल्या प्रशिक्षक इरवानस्याह आदी प्रतामा यांना मिठी मारण्यासाठी धावली.
२०१९ नंतरचा सर्वात मोठा किताब
डिसेंबर २०२४ मध्ये सय्यद मोदी इंटरनॅशनल स्पर्धा जिंकल्यानंतरचे हे सिंधूचे पहिले वर्ल्ड टूर विजेतेपद आहे. तसेच ऑगस्ट २०१९ मध्ये बासेल येथे जागतिक अजिंक्यपद स्पर्धा जिंकल्यानंतर प्रथमच तिने सुपर ७५० किंवा त्यावरील दर्जाची स्पर्धा जिंकली आहे.
प्रशिक्षकांसोबत जल्लोष
पदक वितरणानंतर सिंधूने यामागुचीसोबत सेल्फी घेतला. त्यानंतर तिने प्रशिक्षक इरवानस्याह आदी प्रतामा यांना पोडियमवर बोलावून हा ऐतिहासिक विजय साजरा केला. २०२५ पासून प्रशिक्षक इरवानस्याह यांच्या मार्गदर्शनाखाली सिंधूच्या खेळात पुन्हा आक्रमकता आणि वेग दिसू लागला असून तिच्या फिटनेसमध्येही लक्षणीय सुधारणा झाली आहे.
लॉस एंजेलिस ऑलिम्पिकवर लक्ष्य
२०२६ हंगामाची सुरुवात सिंधूने मलेशिया ओपन सुपर १००० मध्ये उपांत्य फेरी गाठून केली होती. त्यानंतर इंडोनेशिया मास्टर्समध्ये उपांत्यपूर्व फेरी गाठल्यानंतर ऑस्ट्रेलियन ओपनमध्ये उपांत्य फेरीपर्यंत मजल मारली. जपान ओपनमधील या ऐतिहासिक विजयानंतर सिंधूचा आत्मविश्वास उंचावला असून तिचे लक्ष्य आता लॉस एंजेलिस ऑलिम्पिक आहे.
