पश्चिम बंगालमधील हुगळी जिल्ह्यातील एका छोट्याशा गावातून आलेल्या रितू मंडल हिने जागतिक स्तरावर भारताचा तिरंगा अभिमानाने फडकावला आहे. राजमिस्त्रीच्या मुलीने अहमदाबाद येथे झालेल्या पहिल्या विश्व योगासन अजिंक्यपद स्पर्धेत दोन सुवर्णपदके जिंकत इतिहास रचला आहे.
वयाच्या अवघ्या २०व्या वर्षी रितूने जगातील सर्वोत्तम योगासनपटूंना मागे टाकत दुहेरी सुवर्णपदकाची कमाई केली. विशेष म्हणजे, विश्व योगासन स्पर्धेत दोन सुवर्णपदके जिंकणारी ती पहिली भारतीय खेळाडू ठरली आहे.
आर्थिक अडचणींवर मात करून गाठले शिखर
रितूचे वडील राजमिस्त्री म्हणून काम करतात. आर्थिक परिस्थिती बेताची असतानाही कुटुंबाने तिच्या स्वप्नांना कधीच अडथळा येऊ दिला नाही.
“आर्थिक अडचणी होत्या, पण माझ्या कुटुंबाने नेहमीच माझ्या पाठीशी उभे राहून मला प्रोत्साहन दिले. अनेक वर्षांच्या कठोर सराव आणि त्यागानंतर हे यश मिळाले आहे,” असे रितूने सांगितले.
भावाचा विश्वास ठरला प्रेरणादायी
रितूच्या यशामागे तिच्या मोठ्या भावाचाही मोठा वाटा आहे. स्वतः योगासनपटू असलेल्या भावाला परिस्थितीमुळे पुढे जाता आले नाही, पण त्याने बहिणीचे स्वप्न स्वतःचे मानले.
“माझा भाऊ कधीच मला परफेक्ट म्हणत नाही. तो नेहमी सांगतो की अजून सुधारणा कर, अजून पुढे जा. त्याचे हेच शब्द मला अधिक मेहनत करण्याची प्रेरणा देतात,” असे रितू म्हणाली.
सुवर्ण यशानंतरही नजर ऑलिम्पिकवर
यापूर्वी रितूने खेलो इंडिया यूथ गेम्स आणि खेलो इंडिया युनिव्हर्सिटी गेम्समध्ये कांस्यपदके जिंकली होती. त्यानंतर आता जागतिक स्पर्धेत दुहेरी सुवर्णपदक पटकावत तिने मोठी झेप घेतली आहे.
मात्र, या यशाने समाधानी न राहता रितूचे लक्ष्य आणखी मोठे आहे.
“योगासनचा समावेश आशियाई क्रीडा स्पर्धा, राष्ट्रकुल स्पर्धा आणि अखेरीस ऑलिम्पिकमध्ये व्हावा, अशी माझी इच्छा आहे. भारतासाठी ऑलिम्पिक पदक जिंकणे हेच माझे सर्वात मोठे स्वप्न आहे,” असे तिने ठामपणे सांगितले.
गरीब कुटुंबातील एका जिद्दी मुलीने मेहनत, चिकाटी आणि आत्मविश्वासाच्या जोरावर जागतिक मंचावर सुवर्ण यश मिळवले असून, आता तिची नजर थेट ऑलिम्पिक पदकावर आहे.
