लंगणा टी-२० लीगच्या (TG20) पहिल्याच खेळाडू लिलावात मोठे आश्चर्य पाहायला मिळाले. भारतीय संघाचा वेगवान गोलंदाज मोहम्मद सिराज याच्यापेक्षा एका अनकॅप्ड खेळाडूला अधिक किंमत मिळाल्याने क्रिकेट वर्तुळात चर्चा रंगली आहे.
रामोजी फिल्म सिटी येथील प्रिन्सेस कन्व्हेन्शन सेंटरमध्ये झालेल्या लिलावात भारतीय क्रिकेटमधील उदयोन्मुख स्टार तिलक वर्मा सर्वात महागडा खेळाडू ठरला. मेदक फाल्कन्स संघाने त्याच्यावर तब्बल ₹३३ लाखांची बोली लावत आपल्या ताफ्यात सामील केले.
मात्र, सर्वाधिक चर्चेचा विषय ठरला तो सी. व्ही. मिलिंद. या अनकॅप्ड खेळाडूला अन्विता खम्मम एसेस संघाने ₹१७ लाखांत खरेदी केले. विशेष म्हणजे, भारताचा आंतरराष्ट्रीय वेगवान गोलंदाज मोहम्मद सिराज याला वारंगल वॉरियर्स संघाने ₹१४ लाखांत आपल्या संघात घेतले.
आयकॉन खेळाडूंवर मोठी बोली
आयकॉन श्रेणीत अनेक नामांकित खेळाडूंना चांगली किंमत मिळाली.
- तिलक वर्मा – ₹३३ लाख (मेदक फाल्कन्स)
- मोहम्मद सिराज – ₹१४ लाख (वारंगल वॉरियर्स)
- रवि किरण – पालमुरू स्ट्रायकर्स
- टी. रवितेजा – मेदक फाल्कन्स
- तनय त्यागराजन – प्रणव रंगा रेड्डी रायझर्स
- राहुल बुद्धी – अनुराग नलगोंडा नाइट्स
- तन्मय अग्रवाल – करीमनगर डायमंड्स
ए+ आणि ए श्रेणीतही जोरदार स्पर्धा
ए+ श्रेणीत अमन राव, प्रज्ञय रेड्डी, अजय देव गौड, नितीन साई यादव, एरन जॉर्ज आणि रक्षण रेड्डी यांना विविध संघांनी आपल्या ताफ्यात घेतले.
ए श्रेणीत अरफाज अहमद आणि अभिरथ रेड्डी हे प्रत्येकी ₹११ लाखांना विकले गेले आणि या गटातील सर्वाधिक महागडे खेळाडू ठरले.
२१ जूनपासून रंगणार थरार
चारू शर्मांच्या सूत्रसंचालनाखाली पार पडलेल्या या लिलावानंतर आता तेलंगणा टी-२० लीगच्या पहिल्या हंगामाची उत्सुकता वाढली आहे. २१ जूनपासून उप्पलच्या राजीव गांधी आंतरराष्ट्रीय स्टेडियमवर स्पर्धेला सुरुवात होणार असून ८ संघांमध्ये ३२ सामने खेळवले जाणार आहेत.
तेलंगणातील युवा क्रिकेटपटूंना मोठे व्यासपीठ उपलब्ध करून देण्याच्या उद्देशाने सुरू झालेल्या या लीगकडे आता संपूर्ण क्रिकेटविश्वाचे लक्ष लागले आहे.
