टी२० विश्वचषकाआधी संजू सॅमसनला युवराज सिंहचे मार्गदर्शन

भारतीय क्रिकेटमधील स्फोटक फलंदाज म्हणून ओळखले जाणारे युवराज सिंह निवृत्तीनंतरही युवा खेळाडूंसाठी मार्गदर्शकाची भूमिका बजावत आहेत. अभिषेक शर्मा आणि शुभमन गिलसारख्या उदयोन्मुख खेळाडूंना त्यांनी दिलेले प्रशिक्षण आज भारतीय क्रिकेटसाठी फलदायी ठरत आहे. त्याच पार्श्वभूमीवर संजू सॅमसन यानेही युवराजकडून फलंदाजीचे महत्त्वाचे टिप्स घेतल्याचे समोर आले आहे.

टी२० विश्वचषक २०२६ पूर्वतयारीचा भाग म्हणून भारतीय संघ न्यूझीलंडविरुद्ध पाच सामन्यांची टी२० मालिका खेळणार आहे. या मालिकेत संजू सॅमसनचा समावेश असून, तो अभिषेक शर्मा याच्यासोबत डावाची सुरुवात करेल, अशी चर्चा आहे.

न्यूझीलंडविरुद्धच्या मालिकेआधी संजू सॅमसन युवराज सिंहकडून फलंदाजीचे धडे घेताना दिसला. याचा व्हिडिओ सध्या सोशल मीडियावर मोठ्या प्रमाणात व्हायरल होत आहे. या व्हिडिओत युवराज सॅमसनला फुटवर्कसंदर्भातील बारकावे समजावताना दिसत असून, सॅमसन ते लक्षपूर्वक आत्मसात करत असल्याचे पाहायला मिळते.

संजू सॅमसन हा अत्यंत प्रतिभावान फलंदाज असून आंतरराष्ट्रीय स्तरावर त्याने आपली क्षमता सिद्ध केली आहे. उत्तम टाइमिंगसोबत ताकद यांचा मेळ घालत तो स्फोटक खेळी साकारतो. मात्र, काही वेळा फुटवर्कमधील त्रुटींमुळे त्याला विकेट गमवावी लागते. युवराजकडून मिळालेल्या मार्गदर्शनामुळे ही अडचण दूर होण्याची अपेक्षा आहे.

टी२० क्रिकेटमध्ये अभिषेक शर्माने दाखवलेल्या बेधडक फलंदाजीमागे युवराज सिंहचेच मार्गदर्शन असल्याचे तो स्वतः मान्य करतो. त्यामुळे भारतीय क्रिकेटप्रेमींनाही संजू सॅमसनकडून न्यूझीलंड मालिकेत आणि पुढे टी२० विश्वचषक २०२६मध्ये सातत्याने मोठ्या खेळी पाहण्याची अपेक्षा आहे.

संजू सॅमसनने आतापर्यंत ५२ टी२० सामन्यांतील ४४ डावांमध्ये ३ शतके आणि ३ अर्धशतकांसह १,०३२ धावा केल्या आहेत. त्याचा सर्वोच्च स्कोअर १११ असा आहे. न्यूझीलंडविरुद्धची टी२० मालिका आणि त्यानंतरचा टी२० विश्वचषक सॅमसनच्या कारकिर्दीसाठी अत्यंत महत्त्वाचा टप्पा ठरणार आहे.