नवारोचा धडाका! कलिनस्कायाला हरवत यूएस ओपनच्या क्वार्टरफायनल

अमेरिकेची एम्मा नवारो हिने यूएस ओपन २०२६मध्ये दमदार कामगिरी करत महिला एकेरीच्या क्वार्टरफायनलमध्ये प्रवेश केला आहे. आर्थर ऐश स्टेडियमवर झालेल्या चौथ्या फेरीच्या सामन्यात २५व्या मानांकित नवारोने एना कलिनस्कायाचा ६-४, ६-२ असा सरळ सेटमध्ये पराभव केला.

सामन्याच्या सुरुवातीपासूनच नवारोने आक्रमक खेळ करत कलिनस्कायावर दबाव कायम ठेवला. पहिल्या सेटमध्ये तिने ६-४ असा विजय मिळवल्यानंतर दुसऱ्या सेटमध्ये आणखी वेगवान खेळ करत सामना आपल्या ताब्यात घेतला.

दुसऱ्या सेटमध्ये नवारोने सुरुवातीलाच वर्चस्व गाजवत ५-१ अशी भक्कम आघाडी घेतली. कलिनस्कायाने एका सर्व्हिस ब्रेकसह पुनरागमनाचा प्रयत्न केला; मात्र नवारोने आठव्या गेममध्ये पुन्हा तिची सर्व्हिस ब्रेक करत सामना अवघ्या १ तास २१ मिनिटांत संपवला.

नवारोसाठी हा विजय विशेष ठरला. कारण यापूर्वी कलिनस्कायाविरुद्ध झालेल्या दोन्ही सामन्यांत तिला पराभव पत्करावा लागला होता. यावेळी मात्र नवारोने जबरदस्त खेळ करत दोन्ही पराभवांचा हिशेब चुकता केला.

या विजयासह नवारोने कारकिर्दीत चौथ्यांदा ग्रँड स्लॅमच्या क्वार्टरफायनलमध्ये प्रवेश केला आहे. यापूर्वी ती विम्बल्डन २०२४, यूएस ओपन २०२४ आणि ऑस्ट्रेलियन ओपन २०२५मध्ये अंतिम आठमध्ये पोहोचली होती.

२०२४च्या यूएस ओपनमध्ये उपांत्य फेरी गाठणाऱ्या नवारोला यंदा त्यापेक्षाही मोठी मजल मारण्याची संधी आहे. क्वार्टरफायनलमध्ये नवारोसमोर तिचीच हमवतन आणि तिसरी मानांकित जेसिका पेगुला असणार आहे. दोघींमध्ये आतापर्यंत चार सामने झाले असून, चारही सामन्यांत पेगुलाने बाजी मारली आहे.

गेल्या महिन्यात सिनसिनाटी स्पर्धेतही पेगुलाने नवारोचा ७-५, ६-२ असा पराभव केला होता. त्यामुळे या क्वार्टरफायनलमध्ये नवारोकडे पेगुलाविरुद्धचा पराभवाचा हिशेब चुकता करण्याची संधी असेल.

विशेष म्हणजे, २०१५नंतर प्रथमच यूएस ओपन महिला एकेरीच्या क्वार्टरफायनलमध्ये दोन अमेरिकन खेळाडू आमनेसामने येणार आहेत. २०१५मध्ये सेरेना विल्यम्स आणि व्हीनस विल्यम्स यांच्यात अखेरच्या आठसाठी लढत झाली होती.