सुरक्षा कवायतीदरम्यान बनावट बॉम्ब शोधण्यात अयशस्वी, सात पोलीस निलंबित!

स्वातंत्र्य दिनाच्या तयारीसाठी दिल्ली पोलिसांकडून लाल किल्ल्यावर सुरक्षा कवायती घेण्यात येत आहे. या मॉक ड्रिल दरम्यान असे काही घडले की लाल किल्ला परिसराच्या सुरक्षेसाठी तैनात असलेल्या ७ पोलिसांना निलंबित करण्यात आले. यामध्ये एका हेड कॉन्स्टेबलसह ७ कॉन्स्टेबलचा समावेश आहे.

सुरक्षा कवायतीदरम्यान, दिल्ली पोलिसांच्या विशेष कक्षाचे पथक साध्या पोशाखात लाल किल्ल्याच्या परिसरात घुसले. आणि त्यांच्यासोबत एक डमी बॉम्ब घेतला. कवायतीदरम्यान, सुरक्षेसाठी उपस्थित असलेल्या पोलिसांना बॉम्ब शोधण्याची जबाबदारी देण्यात आली होती. परंतु त्यांना बॉम्ब सापडला नाही. सुरक्षेतील या निष्काळजीपणाला मोठी चूक मानून त्यांना निलंबित करण्यात आले.

स्वातंत्र्यदिनाचा मुख्य उत्सव लाल किल्ल्यावर होतो. यामध्ये पंतप्रधान मोदी देशाला संबोधित करतात. स्वातंत्र्यदिनाच्या सोहळ्याच्या पार्श्वभूमीवर, लाल किल्ला २ ऑगस्ट ते १६ ऑगस्ट पर्यंत ‘नो-फ्लाय झोन’ म्हणून घोषित करण्यात आला आहे.

दिल्लीचे पोलिस आयुक्त एसबीके सिंह म्हणाले, भारतीय नागरी संरक्षण संहिता, २०२३ च्या कलम १६३ अंतर्गत, पॅरा-ग्लायडर्स, पॅरा-मोटर्स, हँग-ग्लायडर्स, यूएव्ही, यूएएस, मायक्रोलाईट विमाने, रिमोटली पायलटेड विमाने, हॉट एअर बलून आणि लहान आकाराच्या विमानांचे उड्डाण करण्यास मनाई असेल.

यावेळी, दिल्ली पोलिसांच्या श्वान पथकाने स्वातंत्र्य दिनानिमित्त स्निफर कुत्र्यांना विशेष प्रशिक्षण दिले आहे. श्वान पथकाचे प्रभारी उपनिरीक्षक जितेंद्र डोगरा म्हणाले की, कुत्र्यांना आता स्फोटके आढळल्यास शांतपणे प्रतिक्रिया देण्याचे प्रशिक्षण दिले जात आहे, जसे की शेपटी हलवणे. कारण काही विशेष प्रकारची स्फोटके मोठ्याने भुंकल्याने देखील सक्रिय होऊ शकतात.

हे ही वाचा : 

पंतप्रधान १२ व्या वेळी राष्ट्राला संबोधित करतील

परंपरेनुसार, १५ ऑगस्ट रोजी भारताचे पंतप्रधान दिल्लीतील लाल किल्ल्यावर तिरंगा फडकवतात आणि राष्ट्राला संबोधित करतात. पंतप्रधान नरेंद्र मोदी लाल किल्ल्याच्या तटबंदीवरून राष्ट्राला संबोधित करण्याची ही सलग १२ वी वेळ असेल. यासह, माजी पंतप्रधान जवाहरलाल नेहरू आणि इंदिरा गांधी यांच्यानंतर हे यश मिळवणारे ते तिसरे पंतप्रधान बनतील. यावेळी पंतप्रधान मोदींनी त्यांच्या भाषणासाठी लोकांकडून सूचना मागवल्या आहेत. त्यांनी सोशल मीडिया प्लॅटफॉर्म  एकस्वर ‘नमो अॅप’ किंवा ‘माय जीओव्ही’द्वारे लोकांना सूचना देण्याचे आवाहन केले आहे.