‘एमटी सेट्टेबेलो’ या जहाजावरील हल्ल्यात मृत्युमुखी पडलेल्या दोन भारतीय सागरी कर्मचाऱ्यांचे पार्थिव भारतात पाठवण्यात आल्याची माहिती ओमानमधील भारतीय दूतावासाने बुधवारी (१७ जून) दिली. भारतीय दूतावासाने सोशल मीडिया प्लॅटफॉर्म ‘एक्स’वर निवेदन जारी करत मृतांच्या कुटुंबीयांप्रती शोकसंवेदना व्यक्त केल्या. निवेदनात म्हटले आहे की, “एमटी सेट्टेबेलोवरील दुर्दैवी हल्ल्यात प्राण गमावलेले आदित्य शर्मा आणि शिवानंद चौरसिया यांचे पार्थिव भारतात रवाना करण्यात आले आहे. या कठीण काळात आमच्या संवेदना त्यांच्या कुटुंबीयांसोबत आहेत.”
यापूर्वी मंगळवारी दूतावासाने जहाजावरील सर्व २१ भारतीय चालक दल सदस्य सुरक्षित असून ते ओमानमधून भारतात परतत असल्याची माहिती दिली होती. भारतात रवाना होण्यापूर्वी ओमानमधील भारताचे राजदूत प्रशांत पिसे यांनी चालक दलाच्या सदस्यांची भेट घेऊन त्यांना धीर दिला.
ओमानमधील भारतीय दूतावासाच्या माहितीनुसार, पलाऊ ध्वजाखाली नोंदणीकृत एमटी सेट्टेबेलो या जहाजावर सोहर किनाऱ्यापासून सुमारे ३० सागरी मैल अंतरावर हल्ला झाला होता. या घटनेनंतर २१ भारतीयांना सुरक्षितपणे वाचवण्यात आले, तर तीन खलाशांचा मृत्यू झाला. दूतावासाने सांगितले की, या घटनेची माहिती तत्काळ ओमान मेरीटाइम सिक्युरिटी सेंटरला देण्यात आली होती. त्यानंतर शोध आणि बचाव मोहीम सुरू करण्यात आली. या घटनेनंतर भारत सरकारने कडक भूमिका घेत राजनैतिक स्तरावर निषेध नोंदवला. परराष्ट्र मंत्री एस. जयशंकर यांनी अमेरिकेच्या परराष्ट्र मंत्र्यांशी चर्चा करून या हल्ल्याबाबत तीव्र आक्षेप नोंदवला.
हे ही वाचा:
२०२१ विधानसभा निवडणुकीनंतरच्या हिंसाचार प्रकरणी तृणमूलचे उदयन गुहा अटकेत
इराणच्या तेलवाहू जहाजासह १४ जहाजांनी ओलांडली होर्मुझ सामुद्रधुनी
तृणमूलचे माजी आमदार सब्यसाची दत्ता यांची पाच बँक खाती गोठवली
अफगाणिस्तानला भारताकडून ५ टन अत्यावश्यक औषधांची मदत
भारतीय परराष्ट्र मंत्रालयाने अमेरिकेच्या कार्यवाहक राजदूतांनाही पाचारण करून नागरी जहाजांवरील अशा प्रकारची कारवाई अस्वीकार्य असल्याचे स्पष्ट केले. तसेच यामुळे आंतरराष्ट्रीय सागरी सुरक्षेवर गंभीर परिणाम होऊ शकतात, असेही नमूद केले.
दरम्यान, अमेरिकेच्या सेंट्रल कमांडने या जहाजाला लक्ष्य केल्याची कबुली दिली होती. इराणमधून तेल वाहतूक करणे आणि अमेरिकन निर्देशांचे पालन न करणे, या कारणांमुळे कारवाई करण्यात आल्याचा दावा करण्यात आला. अमेरिकन लष्कराच्या माहितीनुसार, या कारवाईदरम्यान जहाज कार्यक्षमतेबाहेर करण्यात आले. भारताने या घटनेला अत्यंत गंभीर मानत नागरी सागरी जहाजांच्या सुरक्षेची हमी देण्याची आणि भविष्यात अशा घटना टाळण्यासाठी आवश्यक उपाययोजना करण्याची मागणी केली आहे.