मुसळधार पावसाचा चारधाम यात्रेला फटका

उत्तराखंडमध्ये मुसळधार पावसाचा धोका वाढल्याने चारधाम यात्रा तात्पुरती स्थगित करण्यात आली आहे. हवामान विभागाने राज्यातील अनेक जिल्ह्यांसाठी अतिमुसळधार पावसाचा इशारा दिल्यानंतर भाविकांच्या सुरक्षेच्या दृष्टीने प्रशासनाने हा निर्णय घेतला. शनिवार २६ सप्टेंबरच्या दुपारपासून रविवार २७ सप्टेंबरपर्यंत यात्रा बंद ठेवण्यात येणार आहे. हवामान परिस्थितीचा आढावा घेतल्यानंतर यात्रा पुन्हा सुरू करण्याबाबत निर्णय घेतला जाणार आहे.

हवामान विभागाने बागेश्वर, पिथौरागढ, चंपावत, नैनीताल आणि ऊधमसिंह नगर या जिल्ह्यांसाठी रेड अलर्ट जारी केला आहे. तर देहरादून, पौडी, रुद्रप्रयाग, चमोली आणि अल्मोरा येथे ऑरेंज अलर्ट देण्यात आला आहे. २७ सप्टेंबरलाही देहरादून, टिहरी, पौडी आणि हरिद्वारमध्ये रेड अलर्ट, तर उत्तरकाशी, चमोली, नैनीताल आणि रुद्रप्रयागमध्ये ऑरेंज अलर्ट कायम राहणार आहे. मुसळधार पावसामुळे डोंगराळ भागात भूस्खलन, दरडी कोसळणे, रस्ते बंद होणे तसेच नदी-नाल्यांच्या पाणीपातळीत वाढ होण्याचा धोका आहे.
हे ही वाचा:
शटलर आयुष शेट्टीचा पुरुष एकेरीतील प्रवास संपला

हिंजवडी-म्हाळुंगेतील वाहतूककोंडीने आयटी कर्मचारी हैराण

या पार्श्वभूमीवर गढवाल मंडळाचे आयुक्त आनंद स्वरूप यांनी सर्व जिल्हाधिकाऱ्यांना आवश्यक सुरक्षा उपाययोजना करण्याचे निर्देश दिले आहेत. संवेदनशील मार्गांवर लक्ष ठेवण्यासह आपत्कालीन परिस्थितीसाठी यंत्रणा सज्ज ठेवण्याच्या सूचना देण्यात आल्या आहेत. चारधाम यात्रेसाठी मोठ्या संख्येने भाविक उत्तराखंडमध्ये दाखल झाले आहेत. त्यामुळे खराब हवामानात भाविकांच्या सुरक्षिततेला कोणताही धोका निर्माण होऊ नये, यासाठी प्रशासनाने हा निर्णय घेतला आहे. हवामान आणि रस्त्यांची परिस्थिती सुधारल्यानंतर पुढील निर्णय घेतला जाणार आहे.