शिवमंदिराच्या जागेवर उभारलेला पेरियार यांचा पुतळा हटवण्याचे आदेश!

तामिळनाडूतील तंजावर जिल्ह्यातील एका प्राचीन शिवमंदिराच्या मालकीच्या जागेवर उभारण्यात आलेला हिंदू धर्माचे टीकाकार म्हणून ओळखले जाणारे ई. व्ही. रामासामी नायकर अर्थात पेरियार यांचा पुतळा हटवण्याचे निर्देश मद्रास उच्च न्यायालयाने दिले आहेत. तंजावरच्या जिल्हाधिकाऱ्यांनी हा पुतळा चार आठवड्यांच्या आत अन्य ठिकाणी स्थलांतरित करावा, असा आदेश न्यायालयाने दिला आहे.

कंदियूर येथील ब्रह्मा सिरकंडेश्वरर मंदिराच्या मालकीच्या जागेवर हा पुतळा उभारण्यात आला आहे. हे भगवान शिव यांना समर्पित असलेले प्राचीन हिंदू मंदिर असून, भाविकांमध्ये त्याला विशेष धार्मिक महत्त्व आहे.

न्यायमूर्ती वेलमुरुगन आणि रामकृष्णन यांच्या खंडपीठाने मदुराई जिल्ह्यातील एझुमलाई येथील रहिवासी रामा रविकुमार यांनी दाखल केलेल्या याचिकेवर सुनावणी करताना हा आदेश दिला. मंदिराच्या मालकीच्या जागेवर पेरियार यांचा पुतळा उभारण्याच्या निर्णयाला याचिकाकर्त्यांनी आव्हान दिले होते.

हिंदू धार्मिक श्रद्धांवर टीका करणाऱ्या व्यक्तीचा पुतळा हिंदू मंदिराच्या मालकीच्या जागेवर कसा उभारण्यात आला, असा प्रश्न या प्रकरणामुळे उपस्थित झाला आहे. विशेष म्हणजे, पुतळा उभारण्यासाठी हिंदू धार्मिक आणि धर्मादाय देणगी विभागाची (एचआर अँड सीई) आवश्यक परवानगी घेण्यात आली नव्हती, असा दावा याचिकाकर्त्यांनी केला आहे.

हे ही वाचा:

जिओच्या दमदार लिस्टिंगनंतर रिलायन्सचीही घोडदौड

तुरुंगात असलेले मंत्री संजीव अरोरा निवडणूक लढणार

लंगोटी सुटली तरी नाचतोय अब्दुल!

उत्तर प्रदेशातील भाजपची पकड अंगदाच्या पायासारखी अभेद्य

याचिकाकर्त्यांच्या म्हणण्यानुसार, मंदिराच्या जागेवर पेरियार यांचा पुतळा उभारण्यात आल्याची माहिती मिळाल्यानंतर त्यांनी माहिती अधिकार कायद्यांतर्गत संबंधित प्रशासनाकडे माहिती मागवली होती. १४ मे रोजी मंदिराचे कार्यकारी अधिकारी तथा सहाय्यक जनमाहिती अधिकाऱ्यांकडून मिळालेल्या उत्तरात संबंधित मंदिर प्राचीन असल्याचे सांगण्यात आले. तसेच, मंदिराचा महाकुंभाभिषेक ४ सप्टेंबर २०२५ रोजी पार पडल्याची माहितीही देण्यात आली.

मात्र, या माहिती अधिकाराच्या उत्तरातील सर्वात महत्त्वाची बाब म्हणजे ई. व्ही. रामासामी यांचा पुतळा मंदिराच्या मालकीच्या जागेवर उभारण्यासाठी हिंदू धार्मिक आणि धर्मादाय देणगी विभागाने कोणतीही परवानगी किंवा मंजुरी दिलेली नसल्याचे स्पष्ट करण्यात आले होते. या उत्तरावरून पुतळा उभारण्यासाठी आवश्यक असलेली विभागीय परवानगी घेण्यात आली नव्हती, असा युक्तिवाद रविकुमार यांनी केला. त्यानंतर त्यांनी न्यायालयीन प्रक्रियेद्वारे पुतळा हटवण्याची मागणी केली.

 देवाच्या अस्तित्वाला नाकारणारा मजकूर

याचिकाकर्त्यांच्या म्हणण्यानुसार, पेरियार यांचा हा पुतळा १९९० मध्ये मंदिराच्या संरक्षक भिंतीजवळ उभारण्यात आला होता. मात्र, त्यांचा आक्षेप केवळ पुतळा उभारण्यासाठी अधिकृत परवानगी घेतली नसल्यापुरता मर्यादित नव्हता.

पुतळ्याच्या खाली लावण्यात आलेल्या शिलालेखातील मजकुरावरही त्यांनी आक्षेप घेतला. या मजकुरात देवाच्या अस्तित्वाला नकार देण्यात आला असून, देवावर श्रद्धा ठेवणाऱ्या आणि त्याची पूजा करणाऱ्या लोकांसाठी अवमानकारक शब्दांचा वापर करण्यात आल्याचे त्यांनी म्हटले.

या शिलालेखावरील मजकूर असा आहे – “देव नाही, देव नाही, अजिबात देव नाही. देवाची निर्मिती करणारा मूर्ख आहे. देवाचा प्रचार करणारा बदमाश आहे. देवाची पूजा करणारा रानटी आहे.”

हजारो भाविक दरवर्षी दर्शनासाठी येत असलेल्या हिंदू मंदिराच्या परिसरात अशा प्रकारचा मजकूर असलेला पुतळा असणे आक्षेपार्ह असल्याचे रविकुमार यांनी न्यायालयात सांगितले. मंदिराच्या मालकीच्या जागेवर धार्मिक श्रद्धांना स्पष्टपणे नाकारणारा संदेश असलेला पुतळा उभारणे हे त्या परिसराच्या धार्मिक स्वरूपाशी विसंगत असल्याचा युक्तिवादही त्यांनी केला.

हिंदू धार्मिक श्रद्धांना नाकारणारे संदेश असलेले पुतळे महत्त्वाच्या हिंदू तीर्थक्षेत्रांच्या परिसरात उभारण्यास परवानगी कशी दिली जाते, असा प्रश्न त्यांनी उपस्थित केला. मंदिर परिसराच्या जवळ राजकीय पक्षांचे ध्वजस्तंभ उभारण्यावरही त्यांनी आक्षेप घेतला. अशा गोष्टींमुळे पवित्र धार्मिक स्थळांच्या परिसरात अतिक्रमण होत असल्याचे त्यांचे म्हणणे होते.

चर्च आणि मशिदींच्या परिसरात अशा प्रकारच्या उभारणीला सामान्यतः परवानगी दिली जात नाही, असा युक्तिवादही याचिकाकर्त्यांनी केला. मात्र, हिंदू मंदिरांच्या मालकीच्या जागांबाबत वेगळी भूमिका का घेतली जाते, असा प्रश्न त्यांनी उपस्थित केला.