साहिलला कॉपी करताना पकडल्याचा मित्राचा जबाब

आयआयटी मुंबईचा विद्यार्थी साहिल वाकोडे याच्या मृत्यूच्या तपासात महत्त्वाची माहिती समोर आली आहे. मुंबई पोलिसांच्या गुन्हे शाखेने साहिलच्या एका मित्राचा जबाब नोंदवला असून, मृत्यूपूर्वी साहिलने त्याच्याशी फोनवर संवाद साधल्याचा पोलिसांना संशय आहे. या संभाषणात त्याने थर्मोडायनॅमिक्सचा पेपर अपेक्षेप्रमाणे न गेल्याची आणि परीक्षेत कॉपी करताना पकडला गेल्याची माहिती दिल्याचे मित्राने पोलिसांना सांगितल्याचे वृत्त समोर आले आहे.

पोलिसांच्या माहितीनुसार, साहिलने फोनवरील संभाषणात थर्मोडायनॅमिक्सच्या परीक्षेबाबत चिंता व्यक्त केली होती. पेपर चांगला गेला नसल्याने तो अस्वस्थ होता आणि त्याला चांगले गुण मिळवायचे होते, असे त्याच्या मित्राने पोलिसांना सांगितले. तसेच, परीक्षेदरम्यान कॉपी करताना पकडले गेल्याचेही त्याने सांगितल्याचा दावा करण्यात आला आहे.

गुन्हे शाखेने आतापर्यंत सुमारे २० जणांचे जबाब नोंदवले आहेत. यामध्ये परीक्षेच्या वेळी उपस्थित असलेले विद्यार्थी, पर्यवेक्षक आणि संस्थेतील प्रशासकीय अधिकाऱ्यांचा समावेश आहे. साहिलच्या मृत्यूपूर्वीच्या काही तासांत त्याच्या संपर्कात आलेल्या व्यक्तींचीही चौकशी केली जात आहे.

तपास यंत्रणा साहिलच्या मोबाइल फोनमधील माहितीही तपासत आहे. फोनवर पॅटर्न लॉक असल्याने फॉरेन्सिक तज्ज्ञ त्यातील माहिती मिळवण्याचा प्रयत्न करत आहेत. फोनच्या स्क्रीनवर काही मिस्ड कॉलच्या सूचना दिसून आल्याचे पोलिसांनी सांगितले आहे. त्यासोबतच परीक्षा केंद्र, आयआयटी मुंबई परिसर आणि वसतिगृहातील सीसीटीव्ही फुटेज तपासून साहिलच्या हालचालींची क्रमवार माहिती तयार केली जात आहे.

हे ही वाचा:

रमेश म्हात्रेंचा जामीन रद्द, तीन दिवसांत आत्मसमर्पण करा!

‘कॉकरोच’ना शिवाजी पार्कमध्ये आंदोलनाची परवानगी नाकारली

इराणने होर्मुझमध्ये अमेरिकन पाण्याखालील ड्रोन पकडला

दहशतवादामुळे सर्वाधिक प्रभावित देशांच्या यादीत पाकिस्तान अव्वल

साहिल परीक्षेदरम्यान मोबाइलवर चॅटजीपीटीचा वापर करताना आढळल्याचे आयआयटी मुंबईने सुरुवातीला म्हटले होते. मात्र, त्यानंतर संस्थेने या प्रकरणातील आपल्या सुरुवातीच्या संवादाबद्दल माफी मागितली. तपास पूर्ण होण्यापूर्वी साहिलच्या मृत्यूच्या आधी घडलेल्या घटनांबाबत निष्कर्षात्मक स्वरूपात माहिती देणे योग्य नसल्याचे संस्थेने स्पष्ट केले. दरम्यान, यापूर्वी समोर आलेल्या सीसीटीव्ही फुटेजमध्ये साहिल परीक्षेदरम्यान मोबाइल वापरताना दिसत असल्याचे समोर आले होते. त्यानंतर प्राध्यापक सूर्यनारायण दुल्ला यांनी त्याला परीक्षा कक्षाबाहेर नेल्याचे फुटेजमध्ये दिसते. तर, साहिलच्या पालकांनी मुलाला जातीय भेदभाव आणि छळाचा सामना करावा लागल्याचा आरोप केला आहे.