१७ राज्यांत मुसळधार पाऊस आणि वादळाचा IMD चा इशारा

देशभरात मान्सूनपूर्व पावसाने जोर धरला असून भारतीय हवामान विभागाने (IMD) देशातील १७ राज्यांसाठी मुसळधार पाऊस, वादळी वारे आणि विजांच्या कडकडाटाचा इशारा दिला आहे. दिल्ली, उत्तर प्रदेश, बिहार, पंजाब, राजस्थान, झारखंड, पश्चिम बंगाल, उत्तराखंड, हिमाचल प्रदेश, जम्मू-काश्मीर, मध्य प्रदेश, छत्तीसगड, आसाम, केरळ, तमिळनाडू आणि इतर काही राज्यांमध्ये पुढील काही तासांत हवामानात मोठा बदल होण्याची शक्यता वर्तवण्यात आली आहे.

हवामान विभागाच्या अंदाजानुसार अनेक भागांमध्ये ताशी ७० ते ९० किलोमीटर वेगाने वारे वाहू शकतात. काही ठिकाणी मेघगर्जनेसह मुसळधार पाऊस आणि विजांचा कडकडाट होण्याची शक्यता असल्याने नागरिकांना सतर्क राहण्याचे आवाहन करण्यात आले आहे. विशेषतः उत्तर भारतातील दिल्ली-एनसीआर, पंजाब, हरियाणा आणि उत्तर प्रदेशमध्ये अचानक वादळी पाऊस पडण्याची शक्यता आहे.
हे ही वाचा:
अंदमान सागरात सापडला नैसर्गिक वायूचा मोठा साठा 

खान सर यांच्याविरोधात एफआयआर

बिहार आणि झारखंडमध्येही हवामानाचा जोर वाढणार असून काही जिल्ह्यांमध्ये अतिवृष्टीचा इशारा देण्यात आला आहे. बिहारमधील अनेक जिल्ह्यांसाठी यलो अलर्ट जारी करण्यात आला असून स्थानिक प्रशासनाला सज्ज राहण्याच्या सूचना देण्यात आल्या आहेत. दरम्यान, दक्षिण भारतात नैऋत्य मान्सूनची प्रगती वेगाने सुरू आहे. केरळमध्ये मान्सूनचे आगमन झाल्यानंतर तो कर्नाटक, तमिळनाडू आणि गोव्याच्या आणखी काही भागांत पोहोचला आहे. त्यामुळे केरळ, कर्नाटक, तमिळनाडू, तेलंगणा आणि आंध्र प्रदेशमध्ये पुढील काही दिवस व्यापक पावसाची शक्यता व्यक्त करण्यात आली आहे.

पश्चिम भारतातही कोकण, गोवा, मध्य महाराष्ट्र, मराठवाडा आणि गुजरातच्या काही भागांमध्ये पावसाचा जोर वाढण्याचा अंदाज आहे. कोकण-गोवा आणि मध्य महाराष्ट्रात काही ठिकाणी मुसळधार पावसाची शक्यता असल्याचे हवामान विभागाने म्हटले आहे. हवामान खात्याने नागरिकांना वादळाच्या काळात उघड्यावर न थांबण्याचा, झाडांखाली आश्रय न घेण्याचा आणि विजांच्या कडकडाटादरम्यान सुरक्षित ठिकाणी राहण्याचा सल्ला दिला आहे. तसेच शेतकरी, प्रवासी आणि मच्छीमारांनी स्थानिक हवामान अंदाज लक्षात घेऊनच पुढील नियोजन करावे, असेही आवाहन करण्यात आले आहे. देशभरात मान्सूनच्या पुढील वाटचालीमुळे येत्या काही दिवसांत अनेक राज्यांमध्ये पावसाची तीव्रता वाढण्याची शक्यता असून उष्णतेपासून दिलासा मिळणार असला तरी काही भागांत पूरस्थिती आणि वाहतूक विस्कळीत होण्याची शक्यता नाकारता येत नाही.