दिल्लीतील मालवीय नगरमध्ये बुधवारी बेकायदेशीरपणे चालवल्या जाणाऱ्या बेड-अँड-ब्रेकफास्टमध्ये (हॉटेल) आग लागली. या आगीत २१ जणांचा मृत्यू झाला. यानंतर हॉटेल मालक, लवकेश बजाज याला अटक करण्यात आली. दरम्यान, बजाज याला यापूर्वी गेल्या वर्षीही अटक करण्यात आली होती, अशी माहिती समोर आली आहे.
हॉटेल मालकावर एका बांगलादेशी महिलेला, तिच्या मुलीला आणि तिच्या अल्पवयीन नातवाला भारतीय ओळखपत्रे मिळवण्यासाठी आपला रहिवासी पत्ता वापरण्याची परवानगी दिल्याचा आणि त्यांना भारतात बेकायदेशीरपणे राहण्यास मदत केल्याचा आरोप आहे, असे पोलिसांनी सांगितले. उप पोलीस आयुक्त (मध्य) रोहित राजबीर सिंग यांनी सांगितले की, लवकेश बजाजने बांगलादेशी नागरिकांना पासपोर्ट आणि आधार कार्ड मिळवण्यासाठी दिल्लीच्या छतरपूर एन्क्लेव्हमधील आपला पत्ता जाणीवपूर्वक वापरण्याची परवानगी दिली. तीन बांगलादेशी नागरिकांकडे बेकायदेशीरपणे भारतीय कागदपत्रे आढळल्यानंतर, जानेवारी २०२५ मध्ये बजाजवर फसवणूक, बनावटगिरी आणि गुन्हेगारी कट रचल्याचा गुन्हा दाखल करण्यात आला आणि त्याला अटक करण्यात आली.
सिंग यांनी त्या प्रकरणातील तपासाचा हवाला देत सांगितले की, त्यातून असे दिसून आले की, बांगलादेशी नागरिक फसवणुकीने मिळवलेल्या भारतीय ओळखपत्रांचा वापर करून पहारगंजमध्ये बेकायदेशीरपणे राहत होते. त्यांनी सांगितले की, त्यांच्यापैकी एकाने बजाज यांचा पत्ता देऊन भारतीय पासपोर्ट मिळवला होता, हे सिद्ध झाले आहे.
“बजाजला ताब्यात घेऊन त्याची चौकशी करण्यात आली. फसवणूक आणि बनावटगिरीमध्ये त्याची भूमिका सिद्ध झाल्यानंतर त्याला अटक करण्यात आली. त्या बांगलादेशी महिलेला आणि तिच्या मुलीलाही अटक करण्यात आली. तपास पूर्ण झाल्यावर, तिन्ही आरोपींविरुद्ध शहर न्यायालयात आरोपपत्र दाखल करण्यात आले,” असे सिंग म्हणाले. त्यांनी पुढे सांगितले की, कायद्यानुसार कायदेशीर कारवाईसाठी बांगलादेशी अल्पवयीन मुलीच्या बाबतीत एक अहवाल सादर करण्यात आला आहे.
हे ही वाचा:
एअर मार्शल आशुतोष दीक्षित भारतीय हवाई दलाचे पुढील उपप्रमुख
आरबीआयकडून रेपो दर ५.२५ टक्क्यांवर कायम
भारताला एसयू-५७ स्टेल्थ फायटरच्या संयुक्त निर्मितीचा रशियाकडून प्रस्ताव
राजनैतिक मार्गाने किंवा लष्करी कारवाईतून, विजय अमेरिकेचाच!
बुधवारी, बी अँड बी (B&B) मध्ये लागलेल्या आगीत २१ जणांचा मृत्यू आणि २१ जण जखमी झाल्यानंतर काही तासांतच बजाजला अटक करण्यात आली. तळमजल्यावर असलेल्या या सुविधेतील रेस्टॉरंटच्या स्वयंपाकघरात ही आग लागली. तपासात असे आढळून आले की, बजाजकडे रेस्टॉरंट चालवण्याचा परवाना नव्हता. त्याच्याकडे केवळ ‘चहा आणि नाश्ता विक्री केंद्र’ (tea and snacks outlet) परवाना होता, ज्यामध्ये स्वयंपाक करण्याची किंवा बसण्याची परवानगी नव्हती. इतकेच नाही तर, हा चहा- नाश्ता परवानादेखील यावर्षी ३१ मार्च रोजी कालबाह्य झाला होता. आग लागल्याची बातमी मिळाल्यानंतर काही तासांतच, बुधवारी बजाजने परवान्याच्या नूतनीकरणासाठी अर्ज केला होता. हा अर्ज फेटाळण्यात आला.
