निष्णात लढाऊ विमानचालक आणि चाचणी वैमानिक एअर मार्शल आशुतोष दीक्षित यांची हवाई दलाचे पुढील उपप्रमुख म्हणून नियुक्ती करण्यात आली आहे. आशुतोष दीक्षित हे १ जुलै रोजी आपला पदभार स्वीकारतील. सध्या एकात्मिक संरक्षण दल येथे एकात्मिक संरक्षण दल प्रमुख (CISC) म्हणून कार्यरत असलेले दीक्षित यांनी संरक्षण दल थिएटरायझेशनच्या दिशेने वाटचाल करत असताना त्यांच्यातील संयुक्तता वाढविण्यात महत्त्वाची भूमिका बजावली आहे.
एअर मार्शल दीक्षित यांनी हवाई दल मुख्यालयातील आपल्या विविध कार्यकाळात हवाई दलात स्वदेशी लढाऊ विमानांच्या प्रकल्पांना प्रोत्साहन देण्यातही महत्त्वाची भूमिका बजावली आहे. तसेच, त्यांनी दलाच्या आधुनिकीकरणातही महत्त्वपूर्ण योगदान दिले आहे. एअर मार्शल यांना ६ डिसेंबर १९८६ रोजी भारतीय हवाई दलाच्या लढाऊ विमानांच्या शाखेत अधिकारी म्हणून नियुक्त करण्यात आले. ते खडकवासला येथील राष्ट्रीय संरक्षण अकादमी, बांगलादेशातील डिफेन्स सर्व्हिसेस स्टाफ कॉलेज आणि नवी दिल्ली येथील राष्ट्रीय संरक्षण महाविद्यालयाचे माजी विद्यार्थी आहेत. ते एक पात्र उड्डाण प्रशिक्षक आणि प्रायोगिक चाचणी वैमानिक असून, त्यांना मिराज-2000, मिग-21 आणि जॅग्वारसह २० पेक्षा जास्त प्रकारच्या विमानांवर ३,३०० तासांहून अधिक उड्डाणाचा अनुभव आहे.
हे ही वाचा:
आरबीआयकडून रेपो दर ५.२५ टक्क्यांवर कायम
भारताला एसयू-५७ स्टेल्थ फायटरच्या संयुक्त निर्मितीचा रशियाकडून प्रस्ताव
राजनैतिक मार्गाने किंवा लष्करी कारवाईतून, विजय अमेरिकेचाच!
एका वर्षासाठी पाठवलेले यान ११ वर्षे कार्यरत; ‘मेवेन’ मोहिमेचा प्रवास अखेर संपला
एअर मार्शल आशुतोष दीक्षित यांनी दक्षिणी क्षेत्रात एका प्रमुख लढाऊ विमान प्रशिक्षण तळाचे नेतृत्वही केले, जिथे त्यांच्या नेतृत्वामुळे त्या तळाला कमांडमधील सर्वोत्कृष्ट म्हणून गौरवण्यात आले. बंगळूरु येथील एअरक्राफ्ट अँड सिस्टिम्स टेस्टिंग एस्टॅब्लिशमेंटमध्ये चाचणी वैमानिक आणि नंतर फ्लाइट टेस्ट स्क्वॉड्रनचे कमांडिंग ऑफिसर म्हणून, ते जॅग्वार आणि मिग-२७ च्या एव्हियोनिक्स अपग्रेडसह अनेक स्वदेशी अपग्रेड आणि विकास कार्यक्रमांमध्ये सहभागी होते. एअर स्टाफ रिक्वायरमेंट्सचे संचालक म्हणून, त्यांनी मध्यम बहु-भूमिका लढाऊ विमानांच्या चाचण्यांच्या नियोजनात आणि आयोजनात महत्त्वाची भूमिका बजावली.
