भारत-फ्रान्स मिळून बनवणार ‘अरावली’ हेलिकॉप्टर इंजिन

भारत आणि फ्रान्स मिळून नव्या पिढीचे शक्तिशाली हेलिकॉप्टर इंजिन विकसित करणार आहेत. या इंजिनला ‘अरावली’ असे नाव देण्यात आले आहे. हे इंजिन ३,५०० ते ४,००० एसएचपी क्षमतेच्या वर्गातील असेल आणि त्याचे उत्पादन भारतात केले जाणार आहे. यासाठी हिंदुस्तान एअरोनॉटिक्स लिमिटेड (एचएएल) आणि फ्रान्सच्या सॅफ्रान हेलिकॉप्टर इंजिन्स यांनी अंतिम करारावर स्वाक्षरी केली आहे. हा करार दोन्ही कंपन्यांच्या संयुक्त उपक्रम सफहल (SAFHAL) हेलिकॉप्टर इंजिन्स प्रायव्हेट लिमिटेडसोबत करण्यात आला आहे.

‘अरावली’ इंजिन एचएएलच्या आगामी १३ टन वजनाच्या भारतीय मल्टी रोल हेलिकॉप्टर (आयएमआरएच) साठी विकसित केले जाणार आहे. याचा वापर आयएमआरएचच्या नौदलासाठीच्या डेक-बेस्ड मल्टी रोल हेलिकॉप्टर (डीबीएमआरएच) आवृत्तीतही केला जाणार आहे. त्यामुळे भारतीय नौदलाची हवाई क्षमता वाढण्यास मदत होणार आहे. ‘सफहल’ या इंजिनच्या विकासात महत्त्वाची भूमिका बजावणार आहे. कंपनी इंजिनच्या डिझाइन आणि विकासापासून निर्मिती आणि पुरवठ्यापर्यंत काम करणार आहे. तसेच इंजिनच्या व्यापक चाचण्या घेतल्या जातील. त्याच्या देखभालीसह संपूर्ण कार्यकाळात आवश्यक तांत्रिक मदतही उपलब्ध करून दिली जाणार आहे.

Hindustan Aeronautics Limited (HAL) and Safran Helicopter Engines have signed a contract with SAFHAL Helicopter Engines Pvt. Ltd. (SAFHAL) for the design, development, manufacture, supply, and lifecycle support of a new-generation high-power helicopter engine in the 3,500 to… pic.twitter.com/Yi4LWtlH5V

— HAL (@HALHQBLR) August 26, 2026

या प्रकल्पात एचएएल आणि सॅफ्रानच्या तांत्रिक कौशल्याचा वापर केला जाणार आहे. आधुनिक डिझाइन आणि उत्पादन तंत्रज्ञानाच्या मदतीने दोन्ही कंपन्या हे इंजिन विकसित करतील. ‘अरावली’ हे नाव भारतातील अरावली पर्वतरांगांवरून ठेवण्यात आले आहे. अरावली ही जगातील सर्वात प्राचीन पर्वतरांगांपैकी एक मानली जाते. या नावातून भारताच्या एअरोस्पेस क्षेत्रातील आत्मनिर्भरतेची आणि विशेषतः महत्त्वाच्या विमान इंजिन तंत्रज्ञानातील क्षमता वाढवण्याची भूमिका अधोरेखित होते.

हे ही वाचा:

बाब-अल-मंदेबवर भारतीय नौदलाची नजर; दोन जहाजांचा सुरक्षित प्रवास

मुदत संपलेले मासे, अस्वच्छ किचन; बंगळुरूतील हाय-प्रोफाइल क्लबमधील प्रकार

जगभरातील अमेरिकन व्हिसा अपॉइंटमेंट्सला स्थगिती

ऑपरेशन सिंदूरपूर्वी मोदींचे सैन्याला लष्करी कारवाईसाठी पूर्ण स्वातंत्र्य!

‘अरावली’ इंजिनच्या संभाव्य वापराचा मोठा भाग लष्करी क्षेत्राशी संबंधित आहे. मात्र, भविष्यात नागरी हेलिकॉप्टरमध्येही या इंजिनाचा वापर केला जाऊ शकतो. समुद्री वाहतूक, विविध उपयोगिता मोहिमा आणि अतिमहत्त्वाच्या व्यक्तींच्या वाहतुकीसाठी त्याचा वापर होण्याची शक्यता आहे. या कार्यक्रमामुळे भारतातील हेलिकॉप्टर इंजिनची देखभाल, दुरुस्ती आणि ओव्हरहॉल (एमआरओ) क्षमता वाढण्यासही मदत होऊ शकते. त्यामुळे देशांतर्गत हेलिकॉप्टर उद्योगाला बळ मिळण्याची शक्यता आहे.