मुंबईहून दुबईकडे जाणाऱ्या इंडिगोच्या एका विमानाला सोमवारी हवेत असतानाच धुराचा इशारा मिळाल्यानंतर खबरदारीचा उपाय म्हणून गुजरातमधील राजकोट आंतरराष्ट्रीय विमानतळावर आपत्कालीन लँडिंग करावे लागले. सुदैवाने विमानातील सर्व प्रवासी आणि कर्मचाऱ्यांची सुरक्षित सुटका करण्यात आली असून कोणतीही जीवितहानी झालेली नाही.
माहितीनुसार, इंडिगोचे 6E-1452 हे विमान नियमित उड्डाणावर असताना वैमानिकांना विमानात धुराचा इशारा मिळाला. त्यानंतर वैमानिकांनी तातडीने हवाई वाहतूक नियंत्रण (ATC) शी संपर्क साधून राजकोट विमानतळावर आपत्कालीन लँडिंगची परवानगी मागितली. परिस्थितीचे गांभीर्य लक्षात घेऊन विमानतळ प्रशासनाने तात्काळ ‘फुल इमर्जन्सी’ घोषित केली.
विमान सुरक्षितपणे राजकोट विमानतळावर उतरवण्यात आले. विमानात १९४ प्रवासी प्रवास करत होते. लँडिंगनंतर सर्व प्रवाशांना सुरक्षितपणे विमानातून बाहेर काढण्यात आले. विमानतळावर अग्निशमन दल, रुग्णवाहिका आणि आपत्कालीन बचाव पथके आधीच तैनात करण्यात आली होती. मात्र, कोणालाही दुखापत झाली नसल्याचे अधिकाऱ्यांनी स्पष्ट केले आहे.
हे ही वाचा:
अभिषेक बॅनर्जींच्या ‘सेवाश्रय’ शिबिरातील डॉक्टर-विद्यार्थ्यांची होणार चौकशी
‘कोक्रॉच’ आंदोलनानंतर झाला ६० मेट्रिक टन कचरा
मालीत भारतीय हिरे व्यापाऱ्याचे अपहरण; ४४ कोटींची ‘डील’
राजकोट विमानतळाचे संचालक दिगंत बोरा यांनी सांगितले की, धुराचा इशारा मिळाल्यानंतर केवळ खबरदारीचा उपाय म्हणून विमानाचे उड्डाण वळवण्यात आले. विमान सुरक्षित उतरले असून धुराचा इशारा नेमका कशामुळे मिळाला, याचा तपास सुरू आहे. तांत्रिक पथक विमानाची सखोल तपासणी करत आहे. या घटनेमुळे काही काळ विमानतळावर आपत्कालीन यंत्रणा सतर्क ठेवण्यात आली होती. विमानातील प्रवाशांना पुढील प्रवासासाठी पर्यायी व्यवस्था करण्याची प्रक्रिया सुरू करण्यात आली असून, विमानातील धुराच्या इशाऱ्याचे नेमके कारण तपासानंतरच स्पष्ट होणार आहे.
