चाकरमान्यांसह गडकरींनाही मुंबई-गोवा महामार्गाचा ताप!

- Advertisement -

गणेशोत्सव जवळ आला की कोकणात जाणाऱ्या चाकरमान्यांच्या उत्साहासोबत मुंबई-गोवा महामार्गाच्या दुरवस्थेची चिंता पुन्हा ऐरणीवर येते. गेल्या अनेक वर्षांपासून चौपदरीकरणाचे काम सुरू असतानाही महामार्गावरील अनेक भाग अद्याप अपूर्ण असून, खड्डे, वाहतूक कोंडी, धोकादायक वळणे, डायव्हर्शन आणि अपूर्ण पुलांमुळे प्रवाशांना मोठ्या त्रासाला सामोरे जावे लागत आहे. तब्बल १८ वर्षांपासून सुरू असलेल्या या कामाच्या विलंबावर आता प्रश्नचिन्ह उपस्थित होत आहे.

मुंबई-गोवा राष्ट्रीय महामार्गाच्या चौपदरीकरणाचे काम २०१२ पासून सुरू आहे. मात्र २०२६ उजाडूनही महामार्ग पूर्ण क्षमतेने वाहतुकीसाठी उपलब्ध झालेला नाही. सरकार आणि प्रशासनाकडून सुमारे ९० टक्के काम पूर्ण झाल्याचे सांगितले जात असले, तरी प्रत्यक्ष प्रवास करताना अनेक ठिकाणी अपूर्ण कामे, खड्डे आणि वाहतूक कोंडीचा सामना करावा लागत असल्याची नाराजी कोकणवासीयांकडून व्यक्त होत आहे.

माणगाव-इंदापूर बायपासचे काम अद्याप पूर्ण झालेले नसल्याने माणगाव शहरातून जाणाऱ्या वाहनांची मोठी गर्दी होते. गणेशोत्सवाच्या काळात या मार्गावरील वाहतूक कोंडी अधिक गंभीर होण्याची शक्यता असते. चिपळूणमधील पुलाचे कामही पूर्णत्वास न गेल्याने शहरातून जाणाऱ्या वाहतुकीवर त्याचा परिणाम होत आहे.

महामार्गाच्या काही भागांत एका लेनवर काम सुरू असताना दुसऱ्या लेनवरून वाहतूक सुरू ठेवण्यात येते. त्यामुळे वाहनचालकांना मोठ्या जोखमीने प्रवास करावा लागतो. पावसाळ्यात दरडी कोसळणे, रस्त्याची लेव्हल असमान होणे आणि ठिकठिकाणी करण्यात आलेले पॅचवर्क यामुळे रस्त्याच्या गुणवत्तेवरही प्रश्न उपस्थित होत आहेत.

महामार्गावरील नव्याने उभारण्यात आलेल्या काही पुलांवर तडे गेल्याच्या तक्रारी समोर येत आहेत. नागाठणे परिसरातील पुलावरील भेगा बुजवण्यासाठी एम-सीलसारख्या साहित्याचा वापर झाल्याचा आरोप करण्यात येत असून, राष्ट्रीय महामार्गाच्या बांधकामाच्या गुणवत्तेबाबत गंभीर प्रश्न निर्माण झाले आहेत.

कोकणात मोठ्या प्रमाणात पाऊस पडतो. त्यामुळे मुसळधार पावसाचा विचार करून रस्ते, पूल, दरडी आणि निचरा व्यवस्थेचे नियोजन करण्यात आले आहे का, असा सवालही उपस्थित केला जात आहे.

मुंबई-गोवा महामार्गाच्या विलंबाबाबत केंद्रीय रस्ते वाहतूक मंत्री नितीन गडकरी यांनी नाराजी व्यक्त केली असून, या महामार्गाच्या विलंबाची आपल्याला लाज वाटते आणि त्यामुळे उद्घाटनाला उपस्थित राहणार नसल्याचे त्यांनी म्हटल्याचे सांगितले जाते. त्यांच्या या भूमिकेमुळे रखडलेल्या महामार्गाचा मुद्दा पुन्हा चर्चेत आला आहे.

मात्र, केवळ विलंबाबद्दल खंत व्यक्त करून प्रश्न सुटणार नाही. महामार्गाच्या कामात विलंब करणारे कंत्राटदार, संबंधित अधिकारी आणि जबाबदार यंत्रणांवर काय कारवाई झाली, असा प्रश्न कोकणवासीयांकडून उपस्थित केला जात आहे. काही कंत्राटदारांनी काम अर्धवट सोडल्याच्या पार्श्वभूमीवर त्यांच्यावर तसेच संबंधित अधिकाऱ्यांवर जबाबदारी निश्चित करण्याची मागणी होत आहे.

गणेशोत्सव किंवा निवडणुका जवळ आल्या की महामार्गाचे काम लवकर पूर्ण करण्याची आश्वासने दिली जातात. मात्र, प्रत्यक्षात अनेक ठिकाणी कामे अपूर्णच असल्याने कोकणकरांमध्ये नाराजी आहे. दरवर्षी नव्या मुदती जाहीर होतात; मात्र महामार्ग पूर्ण होण्याची निश्चित तारीख कधी मिळणार, असा सवाल आता केला जात आहे.

या महामार्गाचा प्रश्न केवळ वाहतुकीपुरता मर्यादित नसून कोकणच्या आर्थिक आणि पर्यटन विकासाशीही जोडलेला आहे. कोकणातील पर्यटनस्थळांकडे जाण्यासाठी हा महत्त्वाचा मार्ग आहे. मात्र खराब रस्ते, वाहतूक कोंडी आणि प्रवासातील अनिश्चितता यामुळे पर्यटन व्यवसायावरही परिणाम होत असल्याचे स्थानिकांचे म्हणणे आहे.

मुंबई-गोवा महामार्गाची समस्या गणेशोत्सव किंवा होळीच्या काळातच चर्चेत येते. सण संपल्यानंतर मात्र हा मुद्दा पुन्हा मागे पडतो. त्यामुळे केवळ सणांच्या काळात आवाज उठवण्याऐवजी वर्षभर महामार्गाच्या कामाचा दर्जा, प्रगती आणि सुरक्षिततेवर लक्ष ठेवण्याची गरज व्यक्त होत आहे.

कोकणवासीयांना दया किंवा सवलत नको, तर त्यांच्या करातून उभारला जाणारा सुरक्षित, दर्जेदार आणि वेळेत पूर्ण झालेला महामार्ग हवा, अशी भावना आता जोर धरत आहे. महामार्गाचे उर्वरित काम तातडीने पूर्ण करून वाहतूक सुरक्षित करण्याबरोबरच कामाच्या विलंबाला जबाबदार असणाऱ्यांची निश्चिती करण्याची मागणी होत आहे.