गणेशोत्सवासाठी मुंबई पोलिसांचा कडेकोट बंदोबस्त

मुंबई : गणेशोत्सवाच्या काळात नागरिकांनी सुरक्षित आणि निर्भय वातावरणात सण साजरा करावा, यासाठी मुंबई पोलिसांनी शहरात कडेकोट सुरक्षा व्यवस्था तैनात केली आहे. उत्सवाच्या कालावधीत ७ अतिरिक्त पोलिस आयुक्त, ३७ पोलिस उपायुक्त, ५२ सहायक पोलिस आयुक्तांसह २,६५० अधिकारी आणि १४,१५० पोलिस कर्मचारी बंदोबस्तासाठी तैनात करण्यात आले आहेत.

याशिवाय महत्त्वाच्या ठिकाणी एसआरपीएफच्या तुकड्या, क्विक रिस्पॉन्स टीम (QRT), दंगल नियंत्रण पथके आणि होमगार्ड यांचीही नियुक्ती करण्यात आली आहे. गणेशमूर्ती विसर्जनाच्या दिवशी गर्दी आणि सुरक्षेच्या दृष्टीने स्वतंत्र नियोजन करण्यात आले असून, त्यासाठी अतिरिक्त मनुष्यबळ तैनात केले जाणार आहे.
हे ही वाचा:
आयआरसीटीसीकडून एका दिवसात २० लाखांहून अधिक रेल्वे तिकिटांची विक्री

उत्तर प्रदेशात अल-कायदाच्या विचारसरणीचा प्रचार करणाऱ्याला अटक

गणेशोत्सवादरम्यान गर्दीच्या ठिकाणी नागरिकांनी संयम बाळगावा आणि पोलिसांना सहकार्य करावे, असे आवाहन मुंबई पोलिसांनी केले आहे. तसेच कोणतीही बेवारस किंवा संशयास्पद वस्तू आढळल्यास त्याला हात न लावता तातडीने पोलिसांना माहिती द्यावी, असेही पोलिसांनी स्पष्ट केले आहे. तातडीच्या पोलिस मदतीसाठी नागरिकांनी १०० किंवा ११२ या हेल्पलाइन क्रमांकावर संपर्क साधावा, असे आवाहन मुंबई पोलिसांनी केले आहे.