हरियाणातील कुरुक्षेत्र जिल्ह्यातील अढोनी गावात शिवमंदिरातील वृद्ध पुजाऱ्यावर झालेल्या हल्ल्याप्रकरणी मुख्य आरोपी पंकज याच्या घरावर प्रशासनाने बुलडोझर कारवाई केली. पीर दर्ग्याचा सेवेकरी असलेल्या आरोपीच्या घराचा अतिक्रमित भाग जेसीबीच्या साहाय्याने पाडण्यात आला.
जिल्हा प्रशासनाने यापूर्वीच सार्वजनिक गल्लीवरील अतिक्रमण हटविण्याबाबत नोटीस बजावली होती. त्यानंतर सोमवारी सकाळी मोठ्या पोलीस बंदोबस्तात गावात कारवाई करण्यात आली. प्रशासनाच्या माहितीनुसार, आरोपीच्या घराचा एका बाजूला सुमारे सात फूट, तर दुसऱ्या बाजूला साडेतीन फूट भाग सार्वजनिक गल्लीत अतिक्रमण करून बांधण्यात आला होता. सुमारे तीन तास चाललेल्या कारवाईदरम्यान घराचा मोठा भाग पाडण्यात आला.
कारवाईदरम्यान आरोपीच्या आईने घर न पाडण्याची विनंती करत गावातील इतर अतिक्रमणांवरही समान कारवाई करण्याची मागणी केली. मात्र, अनेक ग्रामस्थांनी या कारवाईकडे “जशी करणी तशी भरणी” या म्हणीप्रमाणे पाहिले. काही श्रद्धाळूंनी, “जे करेल ते भोगेल,” अशी प्रतिक्रिया दिली.
वृद्ध पुजाऱ्यावर जीवघेणा हल्ला
९ जुलै रोजी पहाटे चारच्या सुमारास शिवमंदिराचे ७४ वर्षीय पुजारी योगीराज यांच्यावर आरोपी पंकजने कथितपणे क्रूर हल्ला केला होता. त्यांना गंभीर मारहाण करून गळ्यात कापड बांधले आणि गावातील चौकात टाकून दिल्याचा आरोप आहे.
हे ही वाचा:
दिवसभर तेजीचा जल्लोष, अखेरीस नफावसुलीचा ब्रेक
‘सलवार काढला, छाती दाबली… हा बलात्काराचा प्रयत्न नाही’
श्रद्धा वालकरच्या शरीराचे तुकडे अंत्यसंस्काराच्या प्रतीक्षेत…खुनी आफताब मात्र शिकतोय!
रशियन तेलावरून भारताला मोठा दिलासा!
सकाळी पुजारी बेपत्ता असल्याचे लक्षात आल्यानंतर ग्रामस्थ आणि श्रद्धाळूंनी शोध सुरू केला. परिसरातील सीसीटीव्ही फुटेजमध्ये आरोपी पंकज, त्याची पत्नी आणि इंद्र नावाचा आणखी एक आरोपी पुजाऱ्याला गल्लीतून ओढत नेत असल्याचे दिसून आले. यानंतर ग्रामस्थांनी पोलिसांना माहिती दिली. गंभीर जखमी झालेल्या पुजाऱ्यांना तातडीने लोकनायक जयप्रकाश रुग्णालयात दाखल करण्यात आले.
आरोपींची अटक
सदर पोलीस ठाण्याच्या पोलिसांनी कारवाई करत पंकज आणि त्याच्या पत्नीला अटक केली. त्यानंतर शनिवारी संध्याकाळी घटनास्थळाची पाहणी करण्यासाठी आरोपीला गावात आणण्यात आले असता त्याने पळून जाण्याचा प्रयत्न केला. पळून जाण्याच्या प्रयत्नात त्याने पुलावरून उडी मारली, ज्यामुळे त्याच्या पायाला दुखापत झाली. या प्रकरणातील तिसरा आरोपी इंद्र यालाही पोलिसांनी अटक केली आहे.
साधू समाजाची बैठक
या घटनेनंतर साधू समाजाने तीव्र संताप व्यक्त केला असून १५ जुलै रोजी अढोनी गावात विशेष बैठक बोलावली आहे. साधू समाजाच्या प्रतिनिधींनी सांगितले की, मंदिरातील वृद्ध पुजाऱ्यावर झालेला जीवघेणा हल्ला अत्यंत गंभीर असून प्रशासन आपले काम करत आहे. बैठकीत या प्रकरणासह विविध महत्त्वाच्या विषयांवर चर्चा करून पुढील भूमिका निश्चित करण्यात येणार आहे.
