भारतातील लोकप्रिय यूट्यूबर सौरव जोशी याने E20 इंधनामुळे आपल्या मर्सिडीज कारचे मायलेज १७ किमी प्रति लिटरवरून थेट ५ किमी प्रति लिटरपर्यंत घसरल्याचा दावा करत सोशल मीडियावर मोठी चर्चा निर्माण केली होती. त्याच्या या व्हिडिओनंतर अनेक वाहनचालकांमध्ये E20 इंधनाबाबत संभ्रमाचे वातावरण निर्माण झाले. मात्र अवघ्या २४ तासांतच सौरव जोशीने आपल्या वक्तव्यावर यू-टर्न घेत, हा गैरसमज असल्याची कबुली देत सार्वजनिकरित्या माफी मागितली.
सौरव जोशीने सांगितले की, कार अधिकृत मर्सिडीज सर्व्हिस सेंटरमध्ये तपासणीसाठी नेल्यानंतर मायलेज कमी होण्यामागे E20 पेट्रोल कारणीभूत नसल्याचे स्पष्ट झाले. वाहनातील काही तांत्रिक कारणांमुळे ही समस्या निर्माण झाली होती. त्यामुळे सुरुवातीला केलेला निष्कर्ष चुकीचा असल्याचे त्याने मान्य केले. तसेच कोणत्याही कंपनीची प्रतिमा मलिन करण्याचा किंवा चुकीची माहिती पसरवण्याचा आपला हेतू नव्हता, असेही त्याने स्पष्ट केले.
हे ही वाचा:
विनयभंग केल्याचा जाब विचारला म्हणून कुटुंबाचा २० किलोमीटर पाठलाग, गाडीही फोडली
युद्धाच्या धगधगत्या वातावरणात सोन्याची दमदार उसळी
ट्रम्प यांच्या २०% टोल प्रस्तावाने जागतिक बाजार हादरला
निर्बंधांना क्रिप्टोचा आधार; १०४ अब्ज डॉलरचे व्यवहार उघड
दरम्यान, हा वाद वाढल्यानंतर मर्सिडीज-बेंझ इंडियानेही अधिकृत निवेदन जारी करत आपल्या सर्व BS-VI पेट्रोल मॉडेल्स E20 इंधनाशी पूर्णपणे सुसंगत असल्याचे सांगितले. कंपनीने स्पष्ट केले की, सर्व वाहनांची आवश्यक प्रमाणपत्रांनुसार चाचणी करण्यात आली असून E20 इंधनामुळे वाहनाच्या कार्यक्षमतेवर कोणताही प्रतिकूल परिणाम होत नाही. वाहनाच्या मायलेजवर ड्रायव्हिंग पद्धत, वाहतुकीची परिस्थिती, इंजिनची स्थिती, सेन्सर्स आणि इतर तांत्रिक घटकांचा अधिक प्रभाव असतो, असेही कंपनीने नमूद केले.
सौरव जोशीच्या व्हिडिओनंतर सोशल मीडियावर E20 इंधनाबाबत मोठी चर्चा सुरू झाली होती. अनेकांनी सरकारच्या इथेनॉल मिश्रित इंधन धोरणावर प्रश्न उपस्थित केले, तर काहींनी वाहन उत्पादकांकडून स्पष्टीकरणाची मागणी केली. मात्र सौरवच्या नव्या खुलाशामुळे या वादाला वेगळे वळण मिळाले असून E20 इंधनाबाबत पसरलेल्या अनेक शंकांवर पडदा पडण्याची शक्यता व्यक्त केली जात आहे.
भारत सरकार इंधन आयातीवरील अवलंबित्व कमी करण्यासाठी आणि प्रदूषणात घट घडवून आणण्यासाठी E20 इंधनाचा वापर वाढवत आहे. वाहन उत्पादक कंपन्याही नवीन BS-VI पेट्रोल मॉडेल्स E20 सुसंगत बनवत आहेत. अशा परिस्थितीत कोणत्याही तांत्रिक समस्येचे कारण निश्चित करण्यापूर्वी अधिकृत सर्व्हिस सेंटरमध्ये तपासणी करूनच निष्कर्ष काढावा, असा संदेश या संपूर्ण प्रकरणातून समोर आला आहे.
