शेतकऱ्याला वाचविण्यासाठी दिले लाईफ जॅकेट, पण जीवरक्षकाचा जीव गेला

केरळमधील कन्नूर जिल्ह्यात पुराच्या पाण्यात अडकलेल्या ६१ वर्षीय शेतकऱ्याचा जीव वाचवताना ३६ वर्षीय जीवरक्षक आर. राजेश यांचा मृत्यू झाला. राजेश यांनी स्वतःचे लाइफ जॅकेट शेतकऱ्याला दिले आणि त्याला सुरक्षित बाहेर काढले; मात्र परतीच्या प्रवासात ते वेगवान प्रवाहात वाहून गेले.

राजेश हे तिरुवनंतपुरममधील कल्लियूरचे रहिवासी असून मेइंथुल्ली धबधब्यावर जलतरण व रॅपलिंग प्रशिक्षक म्हणून काम करत होते. १ ऑगस्ट रोजी झालेल्या मुसळधार पावसामुळे परिसरात अचानक पूर आला होता. बचावकार्यादरम्यान त्यांनी सहकाऱ्यांसह नदी ओलांडून अडकलेल्या शेतकऱ्याला बाहेर काढण्याचा प्रयत्न केला.

शेतकऱ्याला परत आणताना त्याची प्रकृती बिघडल्याचे पाहून राजेश यांनी स्वतःचे लाइफ जॅकेट काढून त्याला दिले. त्यानंतर दोघेही सुरक्षिततेच्या दोरीच्या मदतीने किनाऱ्याकडे येत असताना राजेश यांची पकड सुटली आणि ते पुराच्या पाण्यात वाहून गेले. तीन दिवसांच्या शोधानंतर मंगळवारी त्यांचा मृतदेह सापडला.

हे ही वाचा:

बंगालचे मुख्यमंत्री शुभेंदूच्या घराची टेहळणी

सलग तिसऱ्या दिवशी सोन्या-चांदीत तेजी

आर्थिक वर्ष २०२६-२७ साठीचा महागाईचा अंदाज ५% वर

मेहबुबा मुफ्तींनी धरला तिरंगा उलटा

राजेश यांनी यापूर्वी २०१८ मधील केरळ पूर आणि २०२४ मधील वायनाड भूस्खलनाच्या बचावकार्यातही सहभाग घेतला होता. त्यांच्या शौर्याला आणि त्यागाला केरळमधील विविध नेत्यांनी श्रद्धांजली वाहिली.