दिल्लीतील लाल किल्ल्याजवळ झालेल्या कार स्फोटाच्या तपासात नवे उघड झाले आहे. स्फोटात वापरण्यात आलेली हुंडई आय- २० ही कार फरीदाबादच्या सेक्टर-३७ भागातील एका सेकंड-हँड कार डिलरकडून खरेदी करण्यात आली होती. स्रोतांनी दिलेल्या माहितीनुसार, ही हुंडई आय-२० कार सुरुवातीला मोहम्मद सलमानकडे होती, ज्याला सोमवारी रात्री अटक करण्यात आली. कारचे मालकी हक्क अनेक वेळा बदलले गेले होते. सुरुवातीला ती नदीमला विकण्यात आली, नंतर फरीदाबादमधील एका सेकंड-हँड कार डिलरकडे गेली. त्यानंतर ही गाडी आमिरने विकत घेतली, मग तारिकने ज्याच्यावरही फरीदाबाद दहशतवादी मॉड्यूलशी संबंध असल्याचा संशय आहे. अखेरीस मोहम्मद उमरने ती कार घेतली होती.
स्रोतांच्या माहितीनुसार, तपास यंत्रणा सध्या आमिर आणि तारिक या दोघांविषयी अधिक ठोस माहिती गोळा करत आहे. दिल्ली पोलिसांच्या सूत्रांनी सांगितले की, सीसीटीव्ही फूटेज तपासल्यानंतर हे स्पष्ट झाले आहे की पांढऱ्या रंगाची आय-२० कार दुपारी सुमारे ३.१९ वाजता लाल किल्ल्याच्या पार्किंग भागात उभी होती आणि ती जवळपास तीन तास तिथेच राहिली. त्यानंतर सायंकाळी सुमारे ६.४८ वाजता ती पार्किंगमधून बाहेर पडली. पोलिस अधिकाऱ्यांच्या म्हणण्यानुसार, कार जेव्हा पार्किंग क्षेत्रातून बाहेर पडली तेव्हा परिसरात मोठी गर्दी होती.
हेही वाचा..
एलोन मस्क यांनी ग्रोकला ओळखायला दिली गणपतीची मूर्ती; ग्रोकने काय दिले उत्तर?
षडयंत्र रचणाऱ्यांना सोडणार नाही!
दहशतवादी हल्ल्यांसाठी रायसिन विषाचा कसा होतो वापर?
दिल्ली बस सेवेतील कंडक्टरच्या दुर्दैवी मृत्यूने शोककळा
आसपासच्या इतर सीसीटीव्ही फूटेजची सखोल तपासणी सुरू आहे, जेणेकरून वाहन पार्किंगमध्ये कोणी आणले, कारमध्ये कोण बसले किंवा उतरले आणि नंतर ती कार कोण चालवत नेली हे स्पष्ट होऊ शकेल. तपास पथके संपूर्ण मार्गाचा मागोवा घेत आहेत. कार कुठून आली, लाल किल्ल्याच्या पार्किंगपर्यंत ती कशी पोहोचली आणि नंतर स्मारकासमोरील ट्रॅफिक सिग्नलकडे कशी गेली हे शोधले जात आहे. पोलिस अधिकाऱ्यांनी पुष्टी केली की, कारचा मार्ग शोधण्यासाठी आणि संशयिताची ओळख पटवण्यासाठी आसपासच्या रस्त्यांवरील आणि पार्किंग टोल प्लाझ्यांवरील फूटेजसह १०० हून अधिक सीसीटीव्ही फूटेज तपासली जात आहेत.
दिल्ली पोलिसांच्या सूत्रांनी सांगितले, “फूटेजमध्ये संशयित एकटाच दिसत आहे.” त्यांनी पुढे सांगितले की, दरियागंजकडे जाणाऱ्या मार्गावरही तपास सुरू आहे. हा स्फोट सोमवारी संध्याकाळी झाला, जेव्हा लाल किल्ला मेट्रो स्टेशनच्या गेट क्रमांक१ जवळ उभी असलेली हुंडई आय-२० कार उडाली. या घटनेत किमान १० जणांचा मृत्यू झाला. ही घटना पोलिसांनी फरीदाबादमध्ये दहशतवादी मॉड्यूलचा भांडाफोड करून २,९०० किलो स्फोटके, मोठ्या प्रमाणात शस्त्रास्त्रे आणि दारुगोळा जप्त केल्यानंतर काही तासांतच घडली. पोलिसांनी सांगितले की, मागील काही दिवसांत त्यांनी जम्मू-काश्मीरमधील दोन डॉक्टर आदिल अहमद राथर आणि मुजम्मिल यांना अटक केली आहे, जे या दहशतवादी संघटनांशी जोडलेले होते. सूत्रांच्या मते, याच कारणामुळे या मॉड्यूलमध्ये घबराट निर्माण झाली आणि स्फोट घडवून आणण्यात आला. या कार ब्लास्टप्रकरणी यूएपीएच्या कलम १६ आणि १८ अंतर्गत तसेच स्फोटक पदार्थ कायदा आणि भारतीय न्याय संहिता (बीएनएस) मधील अनेक कलमांखाली गुन्हा दाखल करण्यात आला आहे.
