भारतीय समुदाय शांतताप्रिय असून परदेशात तोडफोड करत नाही !

परदेशात राहणारा भारतीय समुदाय शांतताप्रिय असून, कायद्याचे पालन करणारा आणि कुटुंबवत्सल आहे. भारतीय नागरिक सार्वजनिक मालमत्तेची तोडफोड करत नाहीत किंवा सार्वजनिक जीवनात अडथळे निर्माण करत नाहीत. त्यामुळेच परदेशात भारतीयांचे स्वागत आणि सन्मान केला जातो, असे प्रतिपादन केंद्रीय वाणिज्य आणि उद्योगमंत्री पीयूष गोयल यांनी केले. जर्मनीच्या दोन दिवसीय दौऱ्यादरम्यान बर्लिन येथे भारतीय समुदायाला संबोधित करताना ते बोलत होते.

युरोपातील फ्रान्स, स्पेन आणि इटलीसह विविध देशांमध्ये वाढती महागाई, वेतन आणि सार्वजनिक सेवांसंदर्भातील प्रश्नांवरून आंदोलने सुरू आहेत. यातील काही आंदोलनांना हिंसक वळण लागल्याच्या पार्श्वभूमीवर गोयल यांनी भारतीय समुदायाच्या वर्तनाचे कौतुक केले.

पीयूष गोयल म्हणाले की, भारतीय नागरिक शांतताप्रिय आहेत आणि आपल्या कुटुंबासोबत राहून त्यांच्या जबाबदाऱ्या पार पाडतात. भारतीय समुदाय कायद्याचे पालन करतो आणि सार्वजनिक मालमत्तेची तोडफोड करत नाही, याची यजमान देशांना जाणीव आहे. युरोपातील काही भागांमध्ये आंदोलनांदरम्यान दिसणाऱ्या गोंधळाच्या तुलनेत भारतीय समुदायाचे वर्तन वेगळे असल्याचेही त्यांनी नमूद केले.

परदेशात स्थायिक झालेल्या भारतीयांनी जर्मनीमध्ये शिक्षणासाठी येणाऱ्या भारतीय विद्यार्थ्यांना मदतीचा हात द्यावा, असे आवाहनही गोयल यांनी केले. विशेषतः आर्थिकदृष्ट्या दुर्बळ कुटुंबांतील विद्यार्थ्यांना सहकार्य करण्याची गरज त्यांनी अधोरेखित केली. परदेशात नवीन वातावरणाशी जुळवून घेताना विद्यार्थ्यांना अनेक अडचणींचा सामना करावा लागतो. अशा वेळी तेथे आधीपासून स्थायिक असलेल्या भारतीयांनी मार्गदर्शन आणि सहकार्य केल्यास विद्यार्थ्यांना शिक्षण तसेच वास्तव्याशी संबंधित आव्हानांचा सामना करणे सोपे होईल, असे पीयूष गोयल यांनी सांगितले.

हे ही वाचा:

गृह, वित्त मंत्रालयाच्या इमारतीत धुराचे लोट

वाराणसीच्या एअर शोदरम्यान लष्करी अधिकारी असल्याचा बनाव

गुजरातमध्ये भारतीय हद्दीत घुसलेल्या चार पाकिस्तानी मच्छीमारांना अटक

ब्राझीलमध्ये डाव्या विचारसरणीचे लुला दा सिल्व्हा चौथ्यांदा राष्ट्राध्यक्ष

पीयूष गोयल यांनी भारतीय कामगारांच्या योगदानाचेही कौतुक केले. भारतीय कामगार प्रामाणिक आणि मेहनती असल्याचे सांगत, भारत आणि जर्मनी यांच्यातील आर्थिक संबंध तसेच दोन्ही देशांतील नागरिकांमधील संबंध दृढ करण्यात परदेशस्थ भारतीयांची महत्त्वाची भूमिका असल्याचे त्यांनी नमूद केले. जर्मनी दौऱ्यादरम्यान गोयल यांनी जर्मन सरकारी अधिकारी, उद्योग क्षेत्रातील प्रतिनिधी आणि संशोधन संस्थांच्या पदाधिकाऱ्यांसोबत बैठका घेतल्या. व्यापार, गुंतवणूक, प्रगत उत्पादन तंत्रज्ञान आणि उदयोन्मुख तंत्रज्ञान या क्षेत्रांमध्ये भारत-जर्मनी सहकार्याच्या नव्या संधी शोधण्यावर या बैठकांमध्ये भर देण्यात आला.