समाजवादी पक्षाचा पदाधिकारी रस्त्यावरच पढत होता नमाज, एफआयआर दाखल

उत्तर प्रदेशातील मुरादाबाद येथे सर्किट हाऊस परिसरात रस्त्यावर नमाज पठण केल्याच्या प्रकरणी समाजवादी पक्षाच्या जिल्हा उपाध्यक्षांविरोधात पोलिसांनी प्रथम माहिती अहवाल दाखल केला आहे.

या प्रकरणी भारतीय न्याय संहितेच्या कलम २८५ आणि २९२ अंतर्गत गुन्हा दाखल करण्यात आला आहे. सार्वजनिक मार्गावर धोका किंवा अडथळा निर्माण करणे आणि सार्वजनिक उपद्रवाशी संबंधित ही कलमे आहेत. मात्र, व्हिडिओमध्ये शांतपणे नमाज पठण करताना दिसणाऱ्या व्यक्तीमुळे प्रत्यक्षात सार्वजनिक मार्गावर कसा अडथळा निर्माण झाला किंवा सार्वजनिक उपद्रव कसा झाला, याबाबत प्रश्न उपस्थित होत आहेत.

नमाज पठण करतानाचा व्हिडिओ समोर आलेली व्यक्ती हाजी मोहम्मद उस्मान असून, ते बिलारीचे आमदार मोहम्मद फहीम इरफान यांचे काका आहेत. उत्तर प्रदेश विधान परिषदेतील विरोधी पक्षनेते लाल बिहारी यादव यांची समाजवादी पक्षाच्या नेत्यांसोबत बैठक होणार होती. या बैठकीसाठी उस्मान सर्किट हाऊसमध्ये आले होते.

समोर आलेल्या व्हिडिओमध्ये उस्मान एका उभ्या असलेल्या मोटारीच्या मागे नमाज पठण करताना दिसत आहेत. या प्रकरणी मुरादाबाद सार्वजनिक बांधकाम विभागाच्या प्रांतीय विभागाचे सहाय्यक अभियंता अनित कुमार यांच्या तक्रारीवरून गुन्हा दाखल करण्यात आला आहे. तक्रारीत म्हटले आहे की, हाजी मोहम्मद उस्मान यांनी सर्किट हाऊसमध्ये ये-जा करण्यासाठी वापरल्या जाणाऱ्या मार्गावर आपले वाहन उभे केले आणि त्यामागे नमाज पठण केले. यामुळे वाहने आणि नागरिकांच्या हालचालींना अडथळा निर्माण झाल्याचा दावा तक्रारीत करण्यात आला आहे.

हे ही वाचा:

‘इक्वल अर्थ’ नकाशाला १६४ देशांचा पाठिंबा

भारताचा परकीय चलनसाठा विक्रमी पातळीवर

नेपाळमधील महाप्रलयातील मृतांचा आकडा १,३४४ वर

सहारनपूरमध्ये अनधिकृत मशिदीवर बुलडोझर

उस्मान नमाज पठण करतानाचा व्हिडिओ समाजमाध्यमांवर मोठ्या प्रमाणात प्रसारित झाल्यानंतर स्थानिक हिंदुत्ववादी संघटनांनी यावर आक्षेप घेतला. राष्ट्रीय बजरंग दलाचे प्रदेशाध्यक्ष रोहन सक्सेना यांनी सरकारी परिसरात नमाज पठण करण्यास प्रशासनाने परवानगी कशी दिली, असा सवाल केल्याचे वृत्त आहे.

दरम्यान, सरकारी परिसरात नमाज पठण करणे स्वतःमध्ये बेकायदेशीर नसल्याचे सांगितले जात आहे. मात्र, उत्तर प्रदेश सरकारने सार्वजनिक रस्त्यांवर नमाज पठण करण्यावर कारवाईची तरतूद केली आहे.