एका ‘कम्प्लिट मॅन’चं जीवन अर्धअधुरं राहिलं!

प्रसिद्ध उद्योगपती विजयपत सिंघानिया यांचे निधन झाले आहे, आणि त्यांच्या जाण्याने भारतीय उद्योगविश्वात एक मोठी पोकळी निर्माण झाली आहे. एकेकाळी हजारो कोटींचे साम्राज्य उभे करणारे आणि रेमंड ग्रुप ( Raymond Group ) ला जागतिक स्तरावर नेणारे हे दिग्गज उद्योजक त्यांच्या संपत्तीइतकेच त्यांच्या वैयक्तिक आयुष्यातील वादामुळेही चर्चेत राहिले. विजयपत सिंघानिया यांनी आपल्या कारकिर्दीत रेमंड समूहाला नवे उंचीवर नेले. “Complete Man” या प्रसिद्ध ब्रँड प्रतिमेमुळे कंपनी घराघरात पोहोचली. त्यांच्या नेतृत्वाखाली कंपनीची मोठी वाढ झाली आणि त्यांची संपत्ती सुमारे ₹११,००० ते ₹१२,००० कोटींवर पोहोचल्याचे मानले जाते. उद्योगाबरोबरच ते एक कुशल वैमानिक होते आणि त्यांनी अनेक विक्रमही केले.
हे ही वाचा:
रशियाकडून भारत घेणार आणखी ५ एस ४०० संरक्षण प्रणाली

पश्चिम आशिया संघर्षाचा भारतात परिणाम

मात्र, त्यांच्या आयुष्यातील सर्वात मोठा वळण २०१५ साली आले, जेव्हा त्यांनी आपल्या संपत्तीतील मोठा हिस्सा मुलगा गौतम सिंघानिया याच्या नावावर केला. सुमारे ३७ टक्के शेअर्स त्यांनी मुलाला दिले, ज्याची किंमत जवळपास ₹१००० कोटी होती. त्यांनी पूर्ण विश्वासाने हा निर्णय घेतला, परंतु पुढे त्यांनीच हा निर्णय चूक असल्याचे मान्य केले.

संपत्ती हस्तांतरणानंतर काही वर्षांतच वडील आणि मुलामध्ये गंभीर मतभेद निर्माण झाले. विजयपत सिंघानिया यांनी आरोप केला की, मुलाने त्यांच्यावर अन्याय केला आणि त्यांना त्यांच्या स्वतःच्या घरातून बाहेर पडावे लागले. एकेकाळी अब्जाधीश असलेले ते पुढे भाड्याच्या घरात राहण्यास भाग पडले, ही बाब समाजात मोठ्या चर्चेचा विषय ठरली. त्यांनी सार्वजनिकरित्या सांगितले की, त्यांनी मुलावर पूर्ण विश्वास ठेवला होता, पण त्याचे परिणाम अत्यंत वेदनादायक ठरले.

दुसरीकडे, गौतम सिंघानिया यांनी या प्रकरणावर प्रतिक्रिया देताना व्यवसाय आणि वैयक्तिक आयुष्य वेगळे असल्याचे सांगितले आणि या वादावर अधिक भाष्य करण्याचे टाळले. तरीही, या वादामुळे सिंघानिया कुटुंब आणि Raymond समूह सतत चर्चेत राहिले.

विजयपत सिंघानिया यांची कहाणी ही केवळ एका यशस्वी उद्योगपतीची नाही, तर विश्वास, संपत्ती आणि नातेसंबंध यांच्यातील संघर्षाची आहे. त्यांच्या निधनानंतर ही कथा पुन्हा एकदा समोर आली असून, अनेकांसाठी ती एक महत्त्वाची शिकवण ठरते की, आर्थिक निर्णय घेताना भावनिक आणि कौटुंबिक पैलूही तितकेच महत्त्वाचे असतात.